МІНСК, 2 кас — Sputnik. Прэзідэнту Беларусі Аляксандру Лукашэнку прадэманстравалі форму беларускіх атлетаў і валанцёраў на II Еўрапейскіх гульнях, калекцыя носіць назву "Прастора", паведамілі ў прэс-службе кіраўніка дзяржавы.
Беларусь прыме II Еўрапейскія гульні з 21 па 30 чэрвеня 2019 года. Удзел у маштабных спаборніцтвах прымуць больш за чатыры тысячы атлетаў з 50 краін Старога свету. Яны будуць змагацца за медалі ў 15 відах спорту.
Прэзентацыя формы гаспадароў Еўрапейскіх гульняў-2019 прайшла сёння ў Палацы Незалежнасці. Узоры прадставілі міністр спорт і турызму Сяргей Кавальчук, першы віцэ-прэзідэнт НАК Андрэй Асташэвіч, дызайнер Юлія Латушкіна і гендырэктар "Сола-Пінск" Васіль Горэгляд.
"Калекцыя атрымала назву "Прастора". Яе сімвал увязаны ў адзіную стылістыку лагатыпа II Еўрапейскіх гульняў і ўвасабляе беларускія бяскрайнія прасторы", — гаворыцца ў паведамленні прэс-службы прэзідэнта.
Латушкіна была дызайнерам формы валанцёраў і ўдзельнікаў акцыі "Полымя міру", а таксама парадна-грамадзянскай і ўзнагароднай формы беларускіх спартсменаў. "За ідэю распрацоўкі экіпіроўкі для валанцёраў і ўдзельнікаў акцыі "Полымя міру" ўзяты стылізаваны сюжэт дрэва жыцця, у якім знайшлі адлюстраванне беларуская выцінанка і сімвалы відаў спорту", — дадалі ў прэс-службе.
Экіпіроўка складаецца з 19 найменняў. Усяго пінскае прадпрыемства плануе выпусціць 500 камплектаў.
