МІНСК, 18 сне - Sputnik. Беларускія лёгкаатлеты абавязаны на II Еўрапейскіх гульнях і летняй Алімпіядзе-2020 у Японіі прадэманстраваць, на што здольныя, заявіў у аўторак прэзідэнт рэспублікі Аляксандр Лукашэнка.
Гэтыя спартыўныя спаборніцтвы кіраўнік дзяржавы назваў важнымі экзаменамі для спартсменаў Беларусі. Асаблівыя надзеі прэзідэнт ускладае на спаборніцтвы, якія пройдуць у Беларусі летам 2019 года, і разлічвае, што падтрымка трыбун дапаможа лёгкаатлетам.
"Трэба перамагаць! Народ стаміўся чакаць вынікаў у гэтай сферы", - цытуе БелТА словы Лукашэнкі.
Кажучы пра падрыхтоўку да II Еўрапейскіх гульняў, прэзідэнт адзначыў, што ўкладзеныя ў іх грошы павінны застацца ў краіне. Кіраўнік дзяржавы нагадаў і аб іміджавай функцыі гэтых спаборніцтваў - па арганізацыі гульняў госці Беларусі будуць судзіць у тым ліку пра краіну.
Для замежнікаў, якія маюць акрэдытацыю на II Еўрапейскія гульні, 20 мая пачне дзейнічаць бязвізавы рэжым з Беларуссю. Да гэтага моманту плануюць вырашыць яшчэ адно пытанне - падпісаць пагадненне аб узаемным прызнанні віз з Расіяй, каб падарожжа ў нашу краіну для гасцей было максімальна камфортным. Самі гульні ў Беларусі пройдуць з 21 па 30 чэрвеня 2019 года, з 1 снежня ўжо можна купіць квіткі. Вядомы і маскот гульняў - ім стала лісяня Лесік.
