ГРОДНА, 31 сту - Sputnik, Іна Грышук. Новая зялёная зона, якая павінна стаць папулярным месцам адпачынку гараджан і турыстаў, з'явіцца ў Гродне ўжо ў гэтым годзе недалёка ад помніка Сакалоўскаму і пешаходнай Савецкай, распавялі на сходзе па абмеркаванні экалагічнай справаздачы новага гандлёва-офіснага цэнтра, які хочуць пабудаваць па вуліцы Замкавай.
На сходзе было узнята адно з важных пытанняў, якое хвалюе гараджан, - гэта лёс зялёнай зоны за Палацам тэкстыльшчыкаў, якую горад аддаў інвестару пад будаўніцтва гандлёва-офіснага цэнтра. Вырашалі - захаваць зялёныя насаджэнні, якія ў апошнія гады імкліва знікаюць ў цэнтры, або пабудаваць копію страчанай у савецкія часы гістарычнай каштоўнасці - Дома рыбака і двух суседніх будынкаў.
Як паведамілі на сходзе прадстаўнікі інвестара, падчас будаўніцтва будзе ссечана 10 з 15 дрэў. Па сутнасці, зялёная зона на пятачку за тэкстыльшчыкаў знікне. Аднак прадугледжаны кампенсацыйныя пасадкі: гэта будзе восем дрэў хуткарослых парод і дзесяць - ліставых парод. Таксама інвестар мае намер зрабіць азеляненне вакол новага гандлёвага цэнтра, але сказаць, колькі дрэў і дзе канкрэтна, яны змогуць пасадзіць, пакуль нельга - спачатку трэба правесці археалагічныя раскопкі.
Як растлумачыў намеснік старшыні Гродзенскага гарвыканкама Андрэй Жук, сквер за Тэкстыльшчыкамі не карыстаецца вялікай папулярнасцю ў гараджан. Таму ў гарадской мэрыі ўзнікла ідэя стварыць іншую зялёную зону, якая стане новым месцам адпачынку. Гэта тэрыторыя ў раёне былога панадворка Дамініканскага манастыра - участак, які знаходзіцца паміж вуліцамі Дамініканскай, Савецкай і корпусам ГрДУ (былы рэстаран "Зубр").
Кампенсацыйныя пасадкі за ссечаныя на Замкавай дрэвы будуць зробленыя менавіта ў гэтым скверы. Жук удакладніў, што новую зялёную зону плануюць пачаць ствараць ўжо ў гэтым годзе і пасадзяць там не толькі гэтыя 18 дрэў, а нашмат больш.
Праблему высечак ў цэнтры Гродна гараджане абмяркоўваюць ўжо больш за дзесяць гадоў. За гэты час з цэнтральных вуліц знікла шмат дрэў, замест іх новыя высаджваліся, але не на цэнтральных вуліцах, а на ўскраінах. Пытанне азелянення старой часткі горада пачалі больш актыўна абмяркоўваць пасля візіту Аляксандра Лукашэнкі ў Гродне ў кастрычніку мінулага года. Тады прэзідэнт зрабіў заўвагу мэру і губернатару: горад і яго старая частка павінны тануць у зеляніне.
Як раней паведамляў Sputnik, участак плошчай 0,15 гектара на вуліцы Замкавай у 2017 годзе купіў на аўкцыёне літоўскі інвестар. На ім прапануюць узвесці гандлёва-офісны аб'ект у выглядзе комплексу з трох невялікіх будынкаў. Яны стануць копіяй Дома рыбака і двух прылеглых да яго будынкаў, якія былі разбураны ў 1960-я гады, каб адкрыць від на Дом побыту.
Адно будзе аднапавярховым плошчай каля 280 квадратных метраў, яшчэ два - двухпавярховымі плошчай каля 230 і 425 квадратных метраў кожнае. Участак на Замкавай быў аддадзены пад забудову ў рамках праекта рэгенерацыі культурна-гістарычнага цэнтра.
