МІНСК, 13 сак - Sputnik. Хворыя на пэўныя псіхічныя расстройствы грамадзяне могуць быць прызнаныя непрыдатнымі да выканання некаторых работ, гэта прадугледжваюць прапанаваныя папраўкі ў закон "Аб аказанні псіхіятрычнай дапамогі".
Законапраект, які ўносіць змены ў закон "Аб аказанні псіхіятрычнай дапамогі", унесены на разгляд беларускіх дэпутатаў.
Як паведаміў БелТА галоўны спецыяліст упраўлення арганізацыі медыцынскай дапамогі Міністэрства аховы здароўя Аляксандр Хаджаеў, у новай рэдакцыі ў законе будзе выкладзены артыкул, які тычыцца абмежаванняў да выканання асобных відаў работ.
"Плануецца пазначыць, што чалавек з псіхічным расстройствам (захворваннем), якое з'яўляецца медыцынскім супрацьпаказаннем да выканання работ з шкоднымі і (або) небяспечнымі ўмовамі працы або работ, дзе ў адпаведнасці з заканадаўствам ёсць неабходнасць у прафесiйным адборы, можа быць прызнаны непрыдатным да выканання такіх работ ў парадку, устаноўленым заканадаўствам", - паведаміла агенцтва.
Дзеючая сёння рэдакцыя артыкула на практыцы не прымяняецца - гэта тлумачаць немагчымасцю рэалізацыі нормы аб распрацоўцы пераліку псіхічных расстройстваў, якія перашкаджаюць выкананню работ па асобных спецыяльнасцях і працы з крыніцамі падвышанай небяспекі.
Акрамя таго, прадугледжаны ў законапраекце і іншыя змены. Так, урачы агульнай практыкі пры аказанні першаснай меддапамогі змогуць праводзіць дыягностыку псіхічных захворванняў, а таксама лячыць іх памежныя формы.
Таксама плануецца весці і медыцынскія агляды спажыўцоў псіхаактыўных рэчываў, якія не маюць прыкмет залежнасці. Пастаянна назіраць псіхіятры будуць не толькі за тымі, хто ўжывае пэўныя прэпараты, але і за тымі, хто захоплены алкагольнымі напоямі, хоць і не прызнаны залежнымі.
Змены ў закон будуць унесены пасля адабрэння парламентарыямі. Некаторыя палажэнні пачнуць дзейнічаць праз паўгода пасля падпісання кіраўніком дзяржавы, іншыя - адразу пасля афіцыйнага апублікавання.
