МІНСК, 25 сак - Sputnik. Рэканструкцыю пункта пропуску "Брузгі" завершаць да пачатку правядзення ў Беларусі II Еўрапейскіх гульняў, паведамілі ў ДМК.
Зараз праектная прапускная здольнасць пункта пропуску на беларуска-польскай мяжы складае пяць тысяч аўтамабіляў у суткі. Пасля мадэрнізацыі яна павялічыцца на 900 грузавых аўтамабіляў у суткі.
"Адно з асноўных змяненняў - павелічэнне колькасці палос для руху як на выезд з краіны, так і на ўезд", - распавялі ў ДМК.
У пункце пропуску будзе сем каналаў на ўезд і шэсць на выезд з краіны. Гэта не адзіная навіна. Для грузавога транспарту ўсталююць сучаснае вагагабарытнае абсталяванне. Усё гэта, як чакаюць у ДМК, дасць магчымасць значна скараціць час знаходжання аўтамабіляў у пункце "Брузгі", і, адпаведна, павялічыць яго прапускную здольнасць па грузавым кірунку больш чым у два разы.
Таксама ў пункце пропуску будзе ўкаранёна аўтаматызаваная сістэма распазнання і рэгістрацыі нумарных знакаў транспартных сродкаў.
Фінансаванне ажыццяўляецца за кошт пазыкі Міжнароднага банка рэканструкцыі і развіцця ў рамках праекта "Мадэрнізацыі транзітнага калідора". Усяго на рамонт пагранпераходу "Брузгі", як чакаецца, сыдзе больш за 4 млн долараў.
