МІНСК, 18 кра - Sputnik. Адсутнасць сваёй школы з’яўляецца адной з галоўных праблем рэстаўрацыйнай галіны Беларусі. Такое меркаванне падчас круглага стала "Замкі Беларусі: пытанні рэканструкцыі і выкарыстання" выказаў старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк.
"Калі мы гаворым пра рэстаўрацыю, не трэба вынаходзіць ровар. Вось рускія ўзялі і запазычылі нармальнае еўрапейскае заканадаўства: ёсць атэстацыя ўсіх, хто працуе на аб’екце, ёсць атэстацыя рэстаўратараў. Велізарная праблема – гэта адсутнасць сваёй рэстаўрацыйнай школы. На гэта мы павінны выдаткаваць грошы ў першую чаргу", - падкрэсліў ён.
Марзалюк упэўнены, што Міністэрства культуры павінна ў першую чаргу дапамагаць музеям ствараць уласныя рэстаўрацыйныя майстэрні.
"Нам неабходная нармальная рэстаўрацыя, а не імітацыя", - дадаў ён.
Другая праблема – адсутнасць якасных будаўнічых матэрыялаў. У якасці прыкладу дэпутат прывёў рэканструкцыю Ніжняга замка ў Вільнюсе.
"Яны паказалі, што такое агульная тоеснасць і гістарычная ідэалогія ў самым лепшым сэнсе гэтага слова", - патлумачыў Марзалюк.
Што тычыцца рэканструкцыі, то яна, па меркаванні дэпутата, дапушчальная толькі калі будзе зроблена карэктна і з карэктных матэрыялаў. У другім выпадку атрымліваецца "лялечны пернік кшталту Лідскага замку".
"З чыноўнікамі трэба размаўляць і тлумачыць ім усе слушнасці", - падкрэсліў ён.
Чытайце таксама:
- Маладая рэстаўратарка пра прэзідэнцкі грант, натхненне і "зорных" калег
- Архітэктар Армэн Сардараў: "Краіна не павінна саромецца сваіх руінаў"
- Шведскі архітэктар: ідэальны рэстаўрацыйны праект зрабіць немагчыма
- "Часам сапёр, часам хірург": чым жывуць беларускія рэстаўратары
