МІНСК, 19 кра - Sputnik. Экіпаж МАЗа пад кіраваннем Аляксея Вішнеўскага выйграў шосты этап ралі Morocco Desert Challenge, паведамілі Sputnik у прэс-службе каманды "МАЗ-СПОРТаўта".
Вішнеўскі праехаў маршрут спецучастка за 4 гадзіны і 50 хвілін, у трох хвілінах ад яго фінішаваў "капотнік" Сяргея Вязовіча.
Пасля перамогі на этапе экіпаж Вішнеўскага ў грузавым заліку падняўся на два радкі ўверх і займае цяпер пятае месца. Лідарам па-ранейшаму застаецца Вязовіч - найбліжэйшы пераследнік, галандзец Роланд Фоерман на MANе, прайграе беларусам крыху больш за 20 хвілін.
Пасля шасці этапаў "чырвоныя зубры" могуць пахваліцца трыма перамогамі (дзве з іх атрымаў Вішнеўскі, адну - Вязовіч).
Сёмы этап зноў прывядзе гоншчыкаў у выдмы, прычым у самую высокую ў Марока - Эрг Шэбі. Экіпажам трэба пераадолець 427 кіламетраў па пяшчаніку і рэчышчах высахлых рэк.
