МІНСК, 15 мая - Sputnik. Нацыянальны алімпійскі камітэт (НАК) далучыцца да міжнароднай акцыі "Ноч музеяў", паведамілі ў прэс-службе НАК.
"17 мая ў НАК Беларусі пройдзе "Ноч у алімпійскім музеі". Трапіць на экскурсію па будынку штаб-кватэры з наведваннем інтэр'ернай экспазіцыі можна па папярэднім запісе", - распавялі ў прэс-службе.
Мерапрыемства пачнецца ў 17:00 і працягнецца да поўначы. Каб трапіць на экскурсію, трэба зарэгістравацца анлайн і выбраць прыдатны час.
"Запіс дазволіць наведаць у суправаджэнні экскурсавода самую буйную спартыўную экспазіцыю ў краіне, убачыць калекцыю алімпійскіх факелаў, спартыўнай экіпіроўкі, сапраўдныя алімпійскія ўзнагароды і мноства ўнікальных прадметаў, якія адлюстроўваюць спартыўную гісторыю нашай краіны", - распавялі ў НАК.
Акрамя таго, госці змогуць наведаць інтэрактыўную зону, дзе ў кожнага жадаючага будзе магчымасць паспрабаваць свае сілы ў лёгкай атлетыцы, стральбе, прайсці алімпійскія тэсты.
"Да ІІ Еўрапейскіх гульняў у экспазіцыі з'явілася асобная вітрына, экспанаты якой распавядаюць гісторыю Еўрапейскіх гульняў, у тым ліку з'яўленне мультыспартыўнага форуму ў Беларусі", - дадалі ў НАК.
Удзел у акцыі таксама возьмуць вядомыя айчынныя спартсмены. "Яны падзеляцца з наведвальнікамі вопытам удзелу ў галоўных спартыўных стартах і прыадкрыюць дзверы ў свет вялікага спорту", - адзначылі ў НАК.
Уваход на "Ноч у алімпійскім музеі" будзе бясплатным.
