Дзень культуры і традыцый Грузіі прайшоў на пляцоўцы ў цэнтры Мінска ў нядзелю 23 чэрвеня. Адпачыць тут можна было з самай раніцы: каля Палаца спорту адкрыліся выставы, працавалі забаўляльныя зоны, а на сцэне выступалі беларускія музыкі.
24 чэрвеня 2019, 10:23
Увесь дзень гасцям свята прапаноўвалі паслухаць цікавыя факты з багатай гісторыі Грузіі, паўдзельнічаць у танцавальных майстар-класах, наведаць фотавыставу, убачыць нацыянальную вопратку і аксэсуары, штучкі ручной работы.
Кульмінацыяй вечара стаў канцэрт вядомай джазавай спявачкі Ніно Катамадзэ: мноства слухачоў сабралася каля сцэны, каб ужывую пачуць легендарны вакал грузінскай спявачкі ў суправаджэнні струннага аркестра "Вялікі рамантык" і калектыву New Live Brass.
