МІНСК, 10 вер - Sputnik. Тарыфы на жыллёва-камунальныя паслугі ў наступным годзе вырастуць у два этапы сумарна на пяць долараў, заявіў у інтэрв'ю "Рэспубліцы" віцэ-прэм'ер Уладзімір Кухараў.
Беларусь апошнія некалькі гадоў ідзе да таго, каб насельніцтва поўнасцю кампенсавала затраты на жыллёва-камунальныя паслугі - гэта з'яўляецца адным з патрабаванняў міжнародных фінансавых структур, у тым ліку МВФ. Пры гэтым рэзка павышаць тарыфы ў рэспубліцы адмовіліся: выбралі шлях паступовага павышэння і адначасова зніжэння іх сабекошту.
"Лічбу, якую пазначыў кіраўнік дзяржавы, - не больш за 5 долараў штогадовага росту тарыфаў, - мы вытрымліваем. Гэтаму спрыяе зніжэнне выдаткаў у ЖКГ. Мы штогод даводзім зніжэнне выдаткаў не менш за 5%. Гэта дазваляе практычна па ўсіх відах паслуг выйсці на іх сабекошт", - распавёў Кухараў.
Па словах віцэ-прэм'ера, акрамя ацяплення і гарачага водазабеспячэння, насельніцтва ўжо на 100% аплачвае ўсе астатнія віды ЖКП. "Далей іх павышэнне магчыма толькі індэксацыяй", - растлумачыў ён.
Пры гэтым, адзначыў Кухараў, у гэтым годзе ў Беларусі былі зменены падыходы да тарыфаў на "камуналку". Так, калі раней з 1 студзеня іх адразу ўздымалі на пяць долараў, то з 2019-га вырашылі павысіць кошт у два этапы.
"З 1 студзеня ўзнялі на 3 долары 90 цэнтаў, а з 1 чэрвеня на ацяпленне і гарачае водазабеспячэнне - на 1 долар і 10 цэнтаў. Бачым, што такую тэндэнцыю трэба працягваць. І на наступны год плануем таксама ў два этапы павышаць. І прыкладна ў такой жа прапорцыі", - растлумачыў ён.
