МІНСК, 18 вер - Sputnik. Праграма інтэграцыі Беларусі і Расіі не апублікаваная з-за таго, што пакуль не зацверджана і мае рабочы характар, паведамілі міністр эканомікі рэспублікі Дзмітрый Крутой ў адказе дэпутату Алене Анісім.
Беларускі ўрад абяцаў апублікаваць праграму інтэграцыі Беларусі і Расіі, аднак і пасля яе парафіравання прэм'ер-міністрамі абнародаваны дакумент не быў. Дэпутат Палаты прадстаўнікоў Анісім накіравала ліст прэм'ер-міністру Сяргею Румасу з просьбай апублікаваць праграму. Адказ ёй прыйшоў за подпісам кіраўніка рабочай групы па інтэграцыі - кіраўніка Мінэканомікі.
"Работа, якая праводзіцца зараз урадамі дзвюх краін, закранае выключна эканамічную частку Дагавора (аб стварэнні Саюзнай дзяржавы - Sputnik) і нацэлена на яе адпаведную рэалізацыю, для чаго падрыхтаваны праект Праграмы дзеянняў Рэспублікі Беларусь і Расійскай Федэрацыі па рэалізацыі палажэнняў Дагавора", - гаворыцца ў адказе Крутога.
Як растлумачыў міністр, сёння дакумент мае статус рабочага і павінен быць зацверджаны прэзідэнтамі ў снежні разам з пакетам дарожных карт.
"Праца па падрыхтоўцы гэтых карт толькі пачалася. Менавіта ў іх будзе ўтрымлівацца дэталізацыя эканамічных дамоўленасцяў паміж бакамі", - дадаў Крутой.
Публікацыя праекта праграмы ў адсутнасці дарожных карт супярэчыла б практыцы арганізацыі перамоваў і магла б "стварыць глебу для інфармацыйных маніпуляцый і фарміравання ў грамадстве скажоных уяўленняў адносна інтэграцыйнага працэсу", - дадаў міністр.
Падкрэсліў Крутой і тое, што дакументы, над якімі вядзецца праца, не ўтрымліваюць палітычнага кампанента і не ствараюць пагроз для суверэнітэту.
Газета "Коммерсант" на гэтым тыдні апублікавала матэрыял з падрабязнасцямі праграмы інтэграцыі Беларусі і Расіі. Сярод пунктаў, згаданых выданнем, было стварэнне адзінага энергетычнага рынку, укараненне адзінага Падатковага кодэкса і уніфікацыя мытнай палітыкі, а таксама шэраг іншых палажэнняў, якія закранаюць эканамічнае супрацоўніцтва дзвюх краін.
