МІНСК, 17 кас - Sputnik. Беларусь магла б палітычным рашэннем адмяніць смяротнае пакаранне, аднак большасць грамадзян рэспублікі яго не падтрымаюць, сказаў кіраўнік беларускага МЗС Уладзімір Макей на сустрэчы з журналістамі беларускіх недзяржаўных СМІ.
Кіраўнік знешнепалітычнага ведамства мяркуе, што палітык павінен "сувымяраць рашэнне з настроем у грамадстве".
"Складанае пытанне. Але і цяпер, калі правесці рэферэндум, думаю, большасць грамадзян выказалася б за захаванне смяротнага пакарання, пра што гавораць і незалежныя апытанні, у тым ліку з удзелам Еўрасаюза", - падкрэсліў Макей.
Ён адзначыў, што "рана ці позна" адпаведнае рашэнне можа быць прынята, аднак варта сувымяраць заявы з настроямі ў грамадстве.
Макей таксама заўважыў, што еўрапейскія партнёры да гэтага часу не могуць прыняць "нейкае палітычнае рашэнне ў дачыненні да Беларусі", між тым, самі падштурхоўваюць Беларусь да прыняцця палітычных рашэнняў па шэрагу пытанняў, а не толькі па пытанні смяротнага пакарання.
"Але ў нашых гутарках з прадстаўнікамі Еўрасаюза мы кажам: "А чаму вы па Беларусі не можаце прыняць палітычнае рашэнне?", і мы чуем у адказ: "У нас ёсць грамадская думка, нас СМІ не так зразумеюць, таму што Беларусь негатыўна выглядае ў вачах грамадскасці", - тлумачыць Макей пазіцыю еўрапейскіх калег.
У Беларусі пакаранне смерцю прымяняецца за ўчыненне асабліва цяжкіх злачынстваў - забойстваў двух і больш чалавек. У выкананне прысуды прыводзяць шляхам расстрэлу. Сваякам і блізкім не паведамляюць пра месца пахавання цела. Не ўжываецца расстрэльны артыкул у адносінах да жанчын і непаўналетніх.
