МІНСК, 6 ліс - Sputnik. Дыпламатычнае прадстаўніцтва дзяржавы Катар адкрыецца ў Беларусі, гэтае пытанне было закранута падчас палітычных кансультацый паміж прадстаўнікамі МЗС дзвюх краін, паведамілі ў прэс-службе беларускага ведамства.
У ходзе кансультацый, якія прайшлі ў аўторак, былі абмеркаваны актуальныя пытанні двухбаковага парадку дня, а таксама ацэнены стан і перспектывы беларуска-катарскага дыялогу, у тым ліку на вышэйшым і высокім узроўнях.
Пытанням адкрыцця пасольства Дзяржавы Катар ў Мінску была нададзена асаблівая ўвага. Як адзначылі дыпламаты, яно пачне працаваць ужо ў бліжэйшы час, аднак дакладная дата не называецца.
"У Беларусь ужо прыбылі два катарскія дыпламаты для адкрыцця пасольства", - распавялі ў прэс-службе.
Акрамя таго, была закранута тэматыка пашырэння двухбаковых гандлёвых сувязяў, інвестыцыйнага супрацоўніцтва, абмену візітамі дэлегацый дзелавых колаў. Дыпламаты таксама абмяняліся думкамі па пытаннях развіцця сітуацыі на Блізкім Усходзе і ў Еўрапейскім рэгіёне і разгледзелі ўзаемадзеянне дзвюх дзяржаў у рамках ААН і іншых шматбаковых міжнародных арганізацый.
Беларускую дэлегацыю ўзначаліў намеснік міністра замежных спраў Андрэй Дапкюнас, катарскую - генеральны сакратар Міністэрства замежных спраў доктар Ахмад Хасан аль-Хамадзі.
