МІНСК, 18 ліс - Sputnik. Кур'ёзныя скаргі і вясёлыя сітуацыі здараліся на выбарах дэпутатаў Палаты прадстаўнікоў сёмага склікання, пра іх распавяла журналістам старшыня ЦВК Лідзія Ярмошына.
Адну са скаргаў у ЦВК атрымалі ад выбаршчыка, які галасаваў на выбарах у першы раз: ён атрымаў штраф і прасіў яго ануляваць.
"ДАІ аштрафавала яго за тое, што ён паставіў машыну ў неналежным месцы. Ён лічыць, што Цэнтральная камісія павінна прыняць меры да адмены штрафу, паколькі ён ехаў на выбары", - распавяла Ярмошына.
Іншы выпадак, якім падзялілася старшыня ЦВК, адбыўся на выбарчым участку ў Магілёве. Аднаго з назіральнікаў выдалілі за фатаграфаванне: яго каментар з нагоды гэтага інцыдэнту выкладзены на сайце праваабаронцаў.
Ярмошына назвала каментар больш чым пацешным. Мужчына прызнаўся, што не збіраўся заставацца на падлік галасоў на гэтым участку, так што вырашыў: чым сыходзіць самастойна, хай лепш яго выдаляць за фатаграфаванне.
"Вось, уласна, матывы дзеянняў - справакаваць скандал, працаваць не хочацца", - патлумачыла Лідзія Ярмошына. Дарэчы, гэтаму назіральніку перашкаджалі працаваць і выбаршчыкі, якія прыходзілі па 8-10 чалавек і засланялі скрыні для галасавання.
