МІНСК, 20 сту - Sputnik. Прэзідэнт Беларусі Аляксандр Лукашэнка прызначыў новага міністра абароны і кіраўніка Генеральнага штаба, адпаведнае рашэнне кіраўнік дзяржавы прыняў у панядзелак.
Дзеючы да сёння кіраўнік Мінабароны Андрэй Раўкоў быў прызначаны дзяржсакратаром Савета бяспекі Беларусі. Алег Белаконеў, які працаваў раней яго намеснікам - кіраўніком Генштаба - восенню мінулага года быў абраны ў парламент.
Згодна з рашэннем прэзідэнта, міністрам абароны стане генерал-маёр Віктар Хрэнін. Раней ён займаў пасаду камандуючага войскамі Заходняга аператыўнага камандавання.
Кіраваць Генштабам будзе генерал-маёр Аляксандр Вальфовіч, які раней займаў пасаду першага намесніка кіраўніка гэтай структуры.
Па словах прэзідэнта, кандыдаты на пасады міністра абароны і начальніка Генштаба разглядаліся некалькі месяцаў.
"Нам вельмі важна цяпер падняць значнасць войскаў. І Хрэнін, і Вальфовіч - гэта людзі аднаго калібра, людзі падрыхтаваныя. Я ўважліва вывучаў іх біяграфіі: яны паралельна прайшлі той жа шлях. Я заўсёды скурпулёзна гляджу, ці былі "на зямлі". Яны і ўзводамі камандавалі, і ротны вопыт, і батальёна. Гэта значыць, яны ведаюць жыццё арміі не па чутках. Гэта вельмі важна. Я думаю, што яны знойдуць паразуменне. Інакш і быць не можа ў беларускім войску. Калі разумення няма, значыць, і людзей там не павінна быць такіх", - адзначыў Лукашэнка, яго словы перадала БелТА.
