МІНСК, 14 лют - Sputnik. Прэзідэнт Беларусі Аляксандр Лукашэнка распавёў падрабязнасці перамоваў з прэзідэнтам Расіі Уладзімірам Пуціным, якія адбыліся тыдзень таму ў Сочы.
Перамовы прэзідэнтаў Беларусі і Расіі прайшлі ў мінулую пятніцу ў Сочы. Асноўнымі пытаннямі, якія абмяркоўваліся на сустрэчы, былі пастаўкі нафты і газу, аднак абмяркоўвалі лідары і іншыя актуальныя тэмы.
Як распавёў у пятніцу калектыву Светлагорскага ЦКК Лукашэнка, форма перамоў была своеасаблівая: прэзідэнты сустрэліся за сняданкам, і ў такім фармаце перамовы працягваліся каля паўтары гадзіны.
Яшчэ ў Сочы Лукашэнка заяўляў пра тое, што з Пуціным яны "абмеркавалі ўсе, пачынаючы з сівых часоў". Сёння кіраўнік дзяржавы растлумачыў: абмяркоўваліся яшчэ праблемы сярэдзіны мінулага стагоддзя, потым бакі закранулі сучасныя пагрозы ў сваім рэгіёне і іншых частках свету.
"Я акуратна выводзіў размову на тое, што разам мы шмат зрабілі", - дадаў Лукашэнка, яго словы прывяла БелТА.
Пасля гэтага прэзідэнты закранулі праблемы ў нафтавай сферы.
Паводле слоў кіраўніка беларускай дзяржавы, расійскі калега спытаў у яго: навошта купляць нафту ў іншых краінах, калі яна ўсё роўна даражэй за расійскую.
На што Лукашэнка адказаў, што Беларусь працягне дыверсіфікаваць закупкі.
"Каб кожны год 31 снежня не стаяць на каленях", - растлумачыў ён.
Як дадаў Лукашэнка, у кіраўніцтве Расіі "намякаюць на далучэнне Беларусі ў абмен на адзіныя кошты на энерганосьбіты".
Пры гэтым прэзідэнт Беларусі перакананы: ні беларускі, ні расійскі народы ніколі не захочуць пайсці па гэтым шляху.
"Памятаеце - ваш першы прэзідэнт, якога вы калісьці абралі, ніколі не стане апошнім. Ужо пасля мяне - думайце як жыць. Але і калі я буду жыць, але не буду прэзідэнтам - я буду заўсёды змагацца, каб наша зямля заставалася суверэннай і незалежнай ", - сказаў Лукашэнка.
"Яны разумеюць інтэграцыю, як паглынанне Беларусі. Гэта не інтэграцыя! Гэта інкарпарацыя! На гэта я ніколі не пайду", - сказаў беларускі лідар.
Нагадаем, на гэтым тыдні чуткі пра сцэнар "далучэння" Беларусі да Расіі абверглі ў Крамлі: з адпаведным заяву выступіў прэс-сакратар прэзідэнта РФ Дзмітрый Пяскоў.
