МІНСК, 6 вер - Sputnik. Беларусь вядзе ў дачыненні да Украіны недружалюбную палітыку, такую заяву зрабіў кіраўнік украінскага МЗС Дзмітрый Кулеба ў эфіры тэлеканала "Прамы".
"Гэта недружалюбная палітыка, і мы не павінны гэтага цярпець", - сказаў міністр, каментуючы рашэнне ўладаў Беларусі адносна перадачы Маскве затрыманых у ліпені грамадзян РФ, якія нібыта ўдзельнічалі ў ваенных дзеяннях у Данбасе, а таксама апошнія заявы прэзідэнта краіны Аляксандра Лукашэнкі.
Затрыманне пад Мінскам
Спецслужбы Беларусі 28 ліпеня затрымалі 33 грамадзян РФ па падазрэнні ў арганізацыі масавых беспарадкаў напярэдадні прэзідэнцкіх выбараў, якія адбыліся 9 жніўня. У Маскве сцвярджаюць, што расійскія грамадзяне затрыманыя беспадстаўна і доказаў іх супрацьпраўнай дзейнасці ў беларускага боку няма. Расія таксама не прызнае ў іх іншага грамадзянства, акрамя РФ.
Раней у СМІ з'явілася інфармацыя аб тым, што затрыманыя расіяне сталі ахвярай правакацыі з боку Кіева. У расійскім МЗС заявілі, што затрыманне ў Беларусі было справакавана трэцім бокам.
Украінскі бок запатрабаваў экстрадыцыі 28 з 33 затрыманых, сцвярджаючы, што яны з'яўляюцца ўдзельнікамі баявых дзеянняў у Данбасе.
Абвінавачванні ў адрас Украіны
На сустрэчы з прэм'ер-міністрам Расіі Міхаілам Мішусціным, якая прайшла 3 верасня, беларускі прэзідэнт Аляксандр Лукашэнка заявіў, што Польшча, Чэхія, Літва і Украіна ўмешваюцца ў справы Беларусі і кіруюць акцыямі пратэсту, якія праходзяць у краіне.
На наступны дзень кіраўнік МЗС Украіны пракаментаваў гэтую заяву, сказаўшы, што "гэтыя заявы (Лукашэнка - Sputnik) ствараюць вельмі негатыўны фон для нашых адносін. Проста таму, што яны абсалютна не адпавядаюць рэчаіснасці".
Украінскі МЗС паведаміў, што краіна гатовая люстрана адказваць на дзеянні Мінска ў дачыненні да Кіева.
Нагадаем, што раней у Кіеве заявілі, што ставяць на паўзу усе працэсы і кантакты з Мінскам і адновяць іх пасля таго, як пераканаюцца, што гэта не прынясе краіне розных страт. У сярэдзіне жніўня МЗС Украіны адклікаў свайго пасла Ігара Кізіма з Мінска для кансультацый пра перспектывы далейшых адносінаў з Беларуссю. Пазней было сказана, што Кіеў не бачыць падстаў для поўнага разрыву дыпламатычных адносін з рэспублікай.
Па выніках сустрэчы з кіраўніком МЗС Беларусі Уладзімірам Макеем, якая прайшла 2 жніўня ў Маскве, міністр замежных спраў Расіі Сяргей Лаўроў заявіў, што радыкальныя дзеянні ў Беларусі фінансуюцца з боку Украіны. У прыватнасці ён адзначыў, што на тэрыторыі Беларусі знаходзяцца каля 200 падрыхтаваных украінскіх экстрэмістаў. У сваю чаргу кіраўнік МЗС Украіны абверг гэтую заяву.
