МІНСК, 6 ліс - Sputnik. Электраэнергію з Беларусі не будуць дапускаць на літоўскі рынак да 2025 года, такую заяву зрабіў міністр энергетыкі Жыгімантас Вайчунас.
Падчас урадавай гадзіны ў Сойме ў чацвер ён паведаміў, што камерцыйны паток электраэнергіі быў спынены на працягу 32 хвілін пасля пуску Астравецкай АЭС - першы энергаблок БелАЭС быў уключаны ў энергасістэму Беларусі 3 лістапада.
"Такім абнуленым ён застанецца да 2025 года, калі завершыцца сінхранізацыя сетак краін Балтыі з Еўропай", - удакладніў ён.
Вайчунас паведаміў, што пасля сінхранізацыі літоўскай сеткі з сеткамі кантынентальнай Еўропы "тэхнічных магчымасцяў для гандлю электраэнергіяй з Беларуссю не застанецца".
Канфлікт з-за БелАЭС
Нагадаем, што першы энергаблок БелАЭС быў уключаны ў энергасістэму Беларусі ў аўторак, 3 лістапада. У адказ на гэта Літва паведаміла аб спыненні куплі электраэнергіі ў рэспублікі і накіравала чарговую ноту.
Літоўскі прэзідэнт Гітанас Наўседа заявіў, што цяпер найбольш прыдатны момант для пастаноў аб абмежаванні доступу электраэнергіі з Беларусі і заклікаў Еўрасаюз "не мірыцца з невыкананнем на Астравецкай АЭС міжнародных стандартаў па ядзернай бяспецы і прыродаахове і не дапусціць на рынак ЕС яе электраэнергію".
Раней краіна-суседка ўжо неаднаразова выступала супраць будаўніцтва Беларускай АЭС, матываваўшы сваю пазіцыю небяспечнасцю станцыі. Беларускі бок пры гэтым настойвае, што БелАЭС адказвае ўсім патрабаванням, якія прад'яўляюцца да бяспекі - гэта неаднаразова пацвярджалася экспертамі міжнародных камісій, у тым ліку МАГАТЭ, ВАО АЭС.
Беларуская АЭС - найбуйнейшы расійска-беларускі эканамічны праект, генпадрадчыкам яе будаўніцтва з'яўляецца "Атамбудэкспарт" (уваходзіць у "Расатам"). Станцыя з двума рэактарамі ВВЭР-1200 сумарнай устаноўленай электрычнай магутнасцю 2400 МВт будуецца ў Астраўцы (Гродзенская вобласць). Для першай у краіне АЭС выбраны перадавы расійскі праект пакалення 3+, які цалкам адпавядае міжнародным нормам і рэкамендацыям МАГАТЭ па бяспецы.
Увод у прамысловую эксплуатацыю энергаблока №2 запланаваны на 2022 год.
