МІНСК, 6 ліс - Sputnik. Беларусі для таго, каб адысці ад залежнасці ад вуглевадародаў трэба пабудаваць яшчэ адну атамную станцыю, заявіў прэзідэнт рэспублікі Аляксандр Лукашэнка на адкрыцці трэцяй лініі сталічнага метрапалітэна.
Паводле яго слоў, у беларускай сталіцы неабходна адыходзіць ад выкарыстання транспарту з рухавікамі ўнутранага згарання, таму што гэта атручвае насельніцтва горада.
У гэтай сувязі асаблівую ўвагу кіраўнік дзяржавы заклікаў сканцэнтраваць на развіцці руху трамваяў. Для гэтага ў парадак трэба прывесці шляхі, каб яны сталі бясшумнымі, бо ў краіне наладжана вытворчасць сваіх добрых трамваяў.
Пасля чаго Лукашэнка нагадаў, што ў краіне ёсць Беларуская атамная станцыя, і першы энергаблок напярэдадні ўключылі ў энергасістэму рэспублікі.
"Электраэнергіі будзе дастаткова. Нашы пратэстоўцы плачуць, што няма куды яе падзець. Слухайце, як няма куды падзець электраэнергію? Нам яшчэ трэба адну такую станцыю пабудаваць, каб адысці ад залежнасці па вуглевадародах. Гэта шчасце, падарунак", - цытуе кіраўніка дзяржавы БелТА.
На суботу, 7 лістапада, намечаны ўрачысты пуск першага энергаблока БелАЭС. У прамысловую эксплуатацыю яго плануецца запусціць у першым квартале будучага года.
