МІНСК, 30 сне - Sputnik. Першыя 10 мільёнаў доз расійскай вакцыны ад каронавіруса "Спутник V" павінны прыбыць у Венесуэлу ў першым квартале 2021, пра гэта паведаміў прэзідэнт краіны Нікалас Мадура падчас трансляцыі ў Twitter.
Вакцынацыя для насельніцтва будзе бясплатнай. Паводле слоў прэзідэнта, на працягу наступных 90 дзён вакцыну атрымаюць 10 мільёнаў чалавек.
"Яны будуць адабраны з улікам іх прафесіі і таго, наколькі вірус для іх небяспечны", - сказаў Мадура.
Клінічныя выпрабаванні расійскай вакцыны ад COVID-19 пачаліся ў Венесуэле ў сярэдзіне кастрычніка. Улады краіны паведамлялі, што яны праходзяць добра. У даследаваннях удзельнічалі дзве тысячы валанцёраў, сярод іх - сястра і сын Нікаласа Мадуры. Сам прэзідэнт паведаміў, што плануе зрабіць прышчэпку, як толькі пачнецца масавая вакцынацыя.
Раней улады паведамлялі, што вакцынацыя пачнецца ў перыяд са снежня па студзень, аднак тэрміны крыху ссунуліся.
Нагадаем, што 29 снежня пачалася масавая вакцынацыя ад каронавіруса расійскай вакцынай "Спутник V" у Беларусі. Першымі прышчэпку зрабілі медыкам, якія непасрэдна працуюць з інфіцыраванымі людзьмі і знаходзяцца ў зоне рызыкі.
Міністр аховы здароўя Беларусі Дзмітрый Піневіч раней паведамляў, што плануецца прышчапіць больш за 5,5 мільёнаў чалавек. Вакцынацыя будзе праводзіцца на добраахвотнай аснове і будзе бясплатнай.
Пачаць выпускаць расійскую вакцыну на беларускіх магутнасцях плануюць ва II квартале 2021 года.
