Сустрэча Пуціна і Лукашэнкі ў Маскве: пра што ўдалося дамовіцца
23:12 09.09.2021 (абноўлена: 23:16 09.09.2021)
© Sputnik / Михаил Воскресенский
/ Падпісацца
Перамовы ў чацвер сталі пятай па ліку сустрэчай лідараў краін Саюзнай дзяржавы ў гэтым годзе. Завяршыліся яны прэс-канферэнцыяй, на якой быў агучаны шэраг прынцыповых дамоўленасцей.
МІНСК, 9 вер – Sputnik. Прэзідэнт Беларусі Аляксандр Лукашэнка і расійскі лідар Уладзімір Пуцін узгаднілі ўсе 28 саюзных праграм і дамовіліся аб цане на расійскі газ для рэспублікі.
Перамовы доўжыліся 4 гадзіны 10 хвілін, адной з самых важных тэм было ўзгадненне саюзных праграм - дасягнуць дамоўленасцей удалося.
"Гаворка ідзе пра 28 так званых "саюзных праграм", якія накіраваны на ўніфікацыю заканадаўства Расіі і Беларусі ў розных галінах эканомікі, на выраўноўванне ўмоў дзейнасці суб'ектаў гаспадарання дзвюх краін, пабудову адзіных фінансавых і энергетычных рынкаў, транспартнай прасторы, фарміраванне і рэалізацыю агульнай прамысловай і сельскагаспадарчай палітыкі. І сёння хацеў бы з задавальненнем адзначыць, што ўзгоднены ўсе дваццаць восем праграм", - сказаў Пуцін.
Паводле яго слоў, Беларусь для Расіі - добры сусед і найбліжэйшы саюзнік, а супрацоўніцтва дзвюх краін будуецца на прынцыпах узаемнай павагі, падтрымкі і ўліку інтарэсаў адзін аднаго.
У пятніцу на саюзным Саўміне саюзныя праграмы прымуць урады, а ў кастрычніку на ВДС іх падпішуць кіраўнікі дзяржаў.
Сутнасць саюзных праграм
Пуцін падкрэсліў, што многія праграмы накіраваны на гарманізацыю падатковага і мытнага заканадаўства Расіі і Беларусі.
Каб бачыць структуру цаны тавару, прадугледжаны дагаворы аб агульных прынцыпах збірання ўскосных падаткаў, укараненне інтэграванай сістэмы адміністравання такіх падаткаў у рамках Саюзнай дзяржавы, адзначыў расійскі лідар.
Акрамя таго, кіраўнікі дзвюх дзяржаў у перспектыве вызначылі агульныя арыенціры фарміравання адзінай грашова-крэдытнай палітыкі, валютнага рэгулявання, інтэграцыі нацыянальных плацежных сістэм і стварэння агульнай плацёжнай прасторы ў рамках Саюзнай дзяржавы.
Пуцін сказаў, што гэтыя меры дапамогуць забяспечыць добрасумленную канкурэнцыю і нарасціць дзелавую актыўнасць на фінансавым рынку, акрамя таго, эфектыўна рэагаваць на рызыкі адмывання грошаў і фінансавання злачыннай дзейнасці, уключаючы тэрарызм.
Палітычная інтэграцыя
Расійскі лідар не выключыў стварэння саюзнай парламента дзвюх краін, але пра гэта варта казаць пазней.
"Мяркуем, што перш за ўсё трэба заняцца эканомікай, а ўсё потым натуральным чынам будзе патрабаваць дадатковага рэгулявання, у тым ліку, можа быць, і на ўзроўні саюзнага парламента. Я не выключаю, што такі можа быць створаны. Але для гэтага трэба, што называецца, падрасці", - сказаў Пуцін.
Крэдыты для Беларусі
Па словах расійскага лідара, РФ працягне ў бліжэйшы час аказваць фінансавую падтрымку рэспубліцы.
"Агульны аб'ём крэдытаў з верасня бягучага года да канца 2022-га складзе недзе 630 мільёнаў долараў. Гэта прыкладна", - сказаў Пуцін.
У сваю чаргу Лукашэнка адзначыў, што цяпер Беларусь не просіць прадастаўлення новых крэдытаў: яна разлічвае аформіць іх у якасці зэканомленых грашовых сродкаў пры будаўніцтве БелАЭС, якія вылучала Расія.
Адчувальная праграма
Расійскі лідар падкрэсліў, што па выніках перамоў атрымалася дасягнуць дамоўленасцей і па адчувальных для Беларусі пытаннях. Гаворка ідзе пра кошты на энерганосьбіты з Расіі.
"Па выніках працяглых дыскусій атрымалася выпрацаваць узаемапрымальныя падыходы па газавай тэматыцы. Цана для Беларусі на расійскі прыродны газ на 2022 год захаваецца на ўзроўні гэтага года", - адзначыў Пуцін.
Акрамя таго, да 1 снежня 2023 года падпішуць дакумент па стварэнні аб'яднанага рынку газу ў рамках Саюзнай дзяржавы.
Таксама, па словах расійскага лідара, прадугледжана заключэнне дагавора паміж Беларуссю і Расіяй аб аб'яднанні рынкаў нафты і нафтапрадуктаў, а таксама дамовы аб сумесным рынку электраэнергіі. Што тычыцца цаны на газ, то расійскі газ будзе пастаўляцца ў Беларусь ў 2022 годзе па цане, якая ўжывалася ў 2021-м, - 128,5 долара за 1 тысячу кубаметраў.
Вучэнні "Захад-2021"
Расійскі лідар адзначыў, што будучыя вучэнні, якія пройдуць на тэрыторыях Расіі і Беларусі, маюць вялікае значэнне.
"Гэтыя вучэнні не накіраваны супраць каго б там ні было, але іх правядзенне лагічна ва ўмовах, калі іншыя аб'яднання, НАТА напрыклад, актыўна нарошчвае сваю ваенную прысутнасць паблізу меж Саюзнай дзяржавы і прасторы АДКБ", - сказаў Пуцін.
Афганістан і пагранічны крызіс
Лукашэнка пракаменціраваў крызіс у Афганістане. Ён адзначыў, што, знаходзячыся ад Афганістана далёка, Беларусь адчула наступствы крызісу ў гэтай краіне.
Таксама беларускі прэзідэнт выказаўся пра сітуацыю на мяжы з ЕС і санкцыях.
Паводле яго слоў, Беларусь выконвае ўсе свае абавязацельствы з партнёрамі, але ва ўмовах санкцый не можа забяспечыць бяспеку Еўрасаюза на мяжы. "Вы супраць нас кожны дзень ўводзіце санкцыі. Мы ўжо па санкцыях на парадак апярэдзілі Расійскую Федэрацыю. І я і беларускі народ што, павінен абараняць іх на мяжы?" - дадаў Лукашэнка.
Пуцін, у сваю чаргу, адказаў на пытанне журналіста пра тое, ці будзе ён ўмешвацца ў рашэнне з мігрантамі на мяжы з Беларуссю.
"Адказ просты: гэта нас не тычыцца", - сказаў прэзідэнт. Паводле яго слоў, краіны Еўрасаюза павінны вырашаць гэтае пытанне з Беларуссю.
"Хочаце па-сапраўднаму праблему вырашаць - звяртайцеся напрамую да беларускіх улад", - дадаў Пуцін.
Сумеснае супрацьстаянне пагрозам
Лукашэнка і Пуцін размаўлялі і пра зоны нестабільнасці, перш за ўсё ў Афганістане, з пункту гледжання пагроз для бяспекі Саюзнай дзяржавы.
"У гэтым кантэксце першачарговая важнасць - забеспячэнне ўсебаковай бяспекі нашых краін і АДКБ у цэлым. Адзіную пазіцыю па гэтым пытанні мы ўсе разам зацвердзім у ходзе будучых мерапрыемстваў у Душанбэ", - сказаў Лукашэнка.
Іншыя тэмы
Прэзідэнты сышліся ў меркаванні, што пра адзіную валюту ў дзвюх краінах казаць рана, бо Беларусь і Расія да гэтага пакуль не гатовы.
Як распавёў расійскі лідар, Беларусь і Расія здымуць усе каронавірусныя абмежаванні ў пасажырскіх авіязносінах.
Таксама прэзідэнты дзвюх краін да канца года плануюць сустрэцца яшчэ, дата будзе ўзгоднена пазней.
Таксама на Sputnik:
Усе 28 саюзных праграм узгоднены - Пуцін
Прэс-канферэнцыя Лукашэнкі і Пуціна пасля сустрэчы ў Маскве - відэа
Мішусцін і Мезенцаў абмеркавалі паглыбленне інтэграцыі ў Саюзнай дзяржаве
Лукашэнка: прыняцце саюзных праграм будзе прарывам
На сваіх палігонах: Лукашэнка і Пуцін прымуць удзел у вучэннях "Захад-2021"
Беларусь хоча аднавіць дакавідны ўзровень пасажырскіх зносін з РФ
Навошта расійскія самалёты прыляцелі на аэрадром Баранавічы?
Беларусь і Расія выканаюць саюзныя праграмы да 2025 года - віцэ-прэм'ер
