У Мінску праходзіць фотавыстава "Чырванаборскі край"
17:21 14.02.2023 (абноўлена: 16:31 01.03.2023)
© Sputnik / Руслан Кривобок
/ Падпісацца
У галерэі "Панарама" Нацыянальнай бібліятэкі Беларусі пачалася фотавыстава "Чырванаборскі край", на якой прэзентаваны здымкі вядомых беларускіх фатографаў, а таксама лепшыя работы студэнтаў, што сталі пераможцамі Рэспубліканскага фотаконкурсу "Маладзёжны погляд".
Куратар праекта Сяргей Плыткевіч расказаў карэспандэнту Sputnik Вользе Дземянчук аб гісторыі стварэння фотавыставы "Чырванаборскі край".
Магчымасць для таленавітай моладзі
Фотавыстава "Чырванаборскі край" – вынік працы Чырванаборскай школы фатаграфіі ў перыяд з 20 па 30 жніўня 2022 года. На выставе ў галерэі Нацыянальнай бібліятэкі Беларусі прадстаўлена больш за сорак жывапісных фатаграфій, палюбавацца якімі можна будзе яшчэ як мінімум на працягу двух месяцаў.
"Дакрануцца да мінулага"
© Photo
У фотавыставы ёсць цікавая перадгісторыя. На поўначы Беларусі (у Верхнядзвінскім раёне) знаходзіцца турыстычны комплекс "Чырвоны Бор". У ім на працягу апошніх двух гадоў праходзіў дабрачынны праект для школьнікаў Полацкага, Расонскага і Верхнядзвінскага раёнаў. Лепшыя вучні Віцебшчыны на працягу двух тыдняў бясплатна пражывалі ў гасцініцы "Ізубрыца" турыстычнага комплексу "Чырвоны Бор", з імі праводзілі заняткі выхавальнікі, дзеці дыхалі свежым паветрам і любаваліся прыгажосцю прыроды роднага краю.
"Зорнае неба над возерам Ізубрыца"
© Photo : Виктор Малащиц
"У мяне з’явілася ідэя пашырыць геаграфію гэтага дабрачыннага праекта – правесці фотаконкурс і даць магчымасць таленавітым дзецям атрымаць новыя веды, пазнаёміцца з унікальным кутком Беларусі. Раней у нас былі сумесныя праекты з Рэспубліканскім цэнтрам тэхнічнай і інавацыйнай творчасці. Я звярнуўся да іх, там мне падказалі, што Міністэрства адукацыі Рэспублікі Беларусь плануе правесці конкурс сярод студэнтаў "Маладзёжны погляд". У выніку мы правялі гэты конкурс сумесна з Міністэрствам адукацыі, вызначылі сем пераможцаў-фіналістаў і прапанавалі ім павучыцца ў нашай школе", - расказвае Сяргей Плыткевіч.
Так для хлопчыкаў і дзяўчынак адкрылася магчымасць бясплатна правесці дзесяць дзён у турыстычным комплексе "Чырвоны Бор", пабываць у фантастычна прыгожым месцы Беларусі – і з пункту гледжання прыроды, і ландшафту, і гістарычнай каштоўнасці.
"Восеньскія матывы"
© Photo : Михаил Лукьянчик
Сяргей Плыткевіч падкрэслівае, што рэалізацыя такога адукацыйнага працэсу для маладых таленавітых людзей была для яго вельмі важная.
"Справа ў тым, што раней я ўзначальваў Рэспубліканскае грамадскае аб’яднанне "Фотамастацтва", люблю фатаграфаваць сам і, вядома, думаю пра будучыню. Будучыня фотамастацтва магчыма толькі ў тым выпадку, калі мы зможам зацікавіць гэтым нашу моладзь. Адзін з такіх варыянтаў – правядзенне конкурсу і атрыманне дадатковых ведаў, прафесійнага вопыту", - тлумачыць куратар праекта.
"Раніца ў Чырвоным бары"
© Photo : Ирена Гудиевская
Майстар-клас ад вядомых майстроў
Усе фіналісты былі вельмі розныя. Напрыклад, студэнтка журфака БДУ Марыя Зіганорава захоплена партрэтнай здымкай, а студэнты Тэхналагічнага ўніверсітэта Іван Веразуб і Міхаіл Лук’янчык – прыроднай фатаграфіяй. Самая малодшая фіналістка, студэнтка Мінскага дзяржаўнага мастацкага каледжа імя Глебава Ганна Беражкова, захапляецца макраздымкай.
"Перада мной стаяла сур’ёзная задача – запрасіць у Чырванаборскую школу выкладчыкаў-прафесіяналаў, са сваім індывідуальным поглядам, каб ахапіць розныя напрамкі фотамастацтва. Сярод нашых выкладчыкаў ёсць вядомыя паспяховыя фатографы: Ірэна Гудзіеўская, галоўныя тэмы творчасці якой – прырода і жанчына, прасоўванне Беларусі, трэвэл-фатограф Сяргей Мілюхін, майстар чароўнай здымкі зорнага неба, жывапісных пейзажаў і панарамы Віктар Малышчыц і ас фотапластыкі Валерый Вядрэнка", - адзначае Плыткевіч.
"Смачны абед"
© Photo : Наталья Лакотко
Дэбют будучых беларускіх фотамастакоў
Падчас "джып-сафары" па Чырвоным бары і ў выкладчыкаў, і ў студэнтаў была магчымасць паглядзець у натуральным асяроддзі на ласёў, ланяў, аленяў і зуброў. Убачыць за пару гадзін паездкі на машыне дзвесце аленяў – гэта сапраўдная экзотыка. Акрамя таго, удзельнікі здзейснілі займальныя пешыя паходы і сплаў па рацэ Свольна, пазнаёміліся з гісторыяй пчалярства – сучаснага і гістарычнага бортніцтва. Усе гэтыя моманты былі адлюстраваны ў кадры.
Кожны дзень у рабят праходзілі лекцыя па тэорыі фатаграфіі, а затым – практычныя заняткі па тэме. Пасля падводзілі вынікі. За час працы Чырванаборскай школы правялі таксама свой унутраны конкурс, пераможцам якога стала Марыя Зіганорава.
"Моц і сіла Чырванаборскай пушчы"
© Photo : Сергей Плыткевич
"Фотавыстава "Чырванаборскі край" унікальная, таму што на ёй прадстаўлены работы як студэнтаў, так і вядомых фатографаў: здымка мадэлей з жывёламі Ірэны Гудзіеўскай, серыя "Сар’я", "Асвея", "Росіца" Валерыя Вядрэнкі, здымка зорнага неба і панарам Віктара Малышчыца. Я спадзяюся, што гэтая сумесная праца натхніла хлопчыкаў і дзяўчынак на жаданне тварыць і ствараць у далейшым сапраўдныя шэдэўры фотамастацтва", - падсумаваў аўтар праекта.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Таксама на Sputnik:
Travel-фатаграфія года: ад выгібаў пустыні Наміб да Унутранай Манголіі
Пераможцы конкурсу імя Андрэя Сценіна 2022 года
Неонавая ружа і акно ў восень: пераможцы конкурсу IPA OneShot "Color"
