Беларусь развівае ваеннае супрацоўніцтва з РФ, КНР і Іранам
16:39 17.05.2023 (абноўлена: 16:42 17.05.2023)
© Sputnik / Виктор Толочко
Падпісацца
Расія пастаўляе Беларусі ваенную тэхніку і зброю, таксама спецыялісты дзвюх краін пастаянна абменьваюцца вопытам.
МІНСК, 17 мая – Sputnik. Беларусь развівае ваеннае супрацоўніцтва з Кітаем, Расіяй і Іранам, заявіў намеснік міністра абароны па ўзбраенні – начальнік узбраення Узброеных Сіл Беларусі Андрэй Федзін, наведваючы выставу MILEX-2023, якая сёння адкрылася ў беларускай сталіцы.
Ён адзначыў, што гэты выставачны форум ужо стаў традыцыйным і з’яўляецца адным з найбольш аўтарытэтных і папулярных у плане ваенна-тэхнічнага супрацоўніцтва ва ўсходнееўрапейскім рэгіёне.
"Усяго ў выставе бяруць удзел у якасці наведвальнікаў і наглядальнікаў больш як 30 краін. Нашым стратэгічным партнёрам з’яўляецца Расійская Федэрацыя – гэта натуральна. Але мы таксама вельмі актыўна супрацоўнічаем з Кітайскай Народнай рэспублікай і Іранам", - падкрэсліў Федзін.
Прадстаўнік Мінабароны звярнуў увагу на тое, што многія беларускія распрацоўкі сёння актыўна выкарыстоўваюцца арміяй краіны.
"Ва Узброеных Сілах эксплуатуецца дастаткова вялікая лінейка сучасных сродкаў узброенай барацьбы, якія вырабляюцца айчыннымі прадпрыемствамі абароннага сектара эканомікі", - сказаў намеснік міністра.
Размова ідзе аб узбраенні і тэхніцы сухапутных войск, сродках супрацьпаветранай абароны, авіяцыі, РЭБ, беспілотніках і сродках барацьбы з імі.
Намеснік кіраўніка ведамства ўдакладніў, што Беларусь у рамках ваенна-тэхнічнага супрацоўніцтва актыўна працуе з пастаўшчыкамі ўзбраення з Расійскай Федэрацыі. "Намі прыняты на ўзбраенне і таксама паспяхова эксплуатуюцца такія ўзоры, як танкі ТТ-7Б3, сродкі радыёлакацыі, якія вырабляюцца канцэрнам "Алмаз-Антей" – 112А6 "Сопка", сістэмы С-400 і многае іншае", - адзначыў Федзін.
Ён дадаў, што такія мерапрыемствы, як MILEX, даюць магчымасць падвесці вынікі ваенна-тэхнічнага супрацоўніцтва, выверыць кропкі судакранання, абмеркаваць шляхі далейшага ўзаемадзеяння і намеціць маршрут сумеснага руху для дасягнення агульнай мэты.
Ударныя беспілотнікі
Sputnik Беларусь спытаў, як ідуць справы з насычэннем арміі ўдарнымі беспілотнікамі. Намеснік міністра адказаў, што прадпрыемствы абароннага сектара краіны праводзяць мэтанакіраваную работу па распрацоўцы, пастаноўцы на вытворчасць цэлай лінейкі ўдарных беспілотных лятальных комплексаў.
"Чакан", "Квадра-1400" і многія іншыя. Гэтыя распрацоўкі зараз знаходзяцца на завяршальнай стадыі. Ужо да канца года мы плануем ажыццявіць іх выпрабаванні і пастаноўку на ўзбраенне", - сказаў Федзін.
Вопыт СВА
Ён таксама падкрэсліў, што Мінабароны Беларусі дэталёва вывучае вопыт ваеннай спецаперацыі ва Украіне.
"Спецаперацыя паказала высокую важнасць сродкаў супрацьпаветранай абароны, авіяцыі. Нельга скідаць з рахункаў узбраенне сухапутных войск, у першую чаргу – артылерыі, бранятанкавага ўзбраення і тэхнікі, любых браніраваных машын, якія могуць выкарыстоўвацца на полі бою", - дадаў Федзін.
Акрамя таго, намеснік кіраўніка ведамства закрануў тэму абароны ад беспілотнікаў і запэўніў, што ваенныя Беларусі надаюць гэтаму вялікую ўвагу.
Міжнародная выстава ўзбраенняў і ваеннай тэхнікі MILEX-2023 адкрылася ў беларускай сталіцы 17 мая, форум будзе працаваць на працягу чатырох дзён. На выставу прывезлі як новыя распрацоўкі беларускага ваенпрама, так і работы збройнікаў з Расіі, Кітая і іншых краін.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Хрэнін расказаў, колькі найноўшай тэхнікі атрымала армія Беларусі ў 2022-м
Шэраг праграм СД накіраваны на ўмацаванне абараназдольнасці Беларусі
