Лукашэнка не задаволены сістэмай функцыянавання кадраў
11:52 16.06.2023 (абноўлена: 12:31 16.06.2023)
© Пресс-служба президента Беларуси
Падпісацца
Кадравая палітыка ў вышэйшых эшалонах выбудоўваецца на ўзроўні адміністрацыі прэзідэнта, галоўным крытэрыем працы з’яўляецца дасягненне выніку.
МІНСК, 16 чэр – Sputnik. Кадры вырашаюць усё, і гэта застаецца ісцінай, заявіў кіраўнік Беларусі Аляксандр Лукашэнка на нарадзе па кадравай палітыцы ў Палацы Незалежнасці ў пятніцу.
Паводле яго слоў, у рамках гэтага мерапрыемства трэба абмеркаваць, як вядзецца кадравая работа і вызначыць, якія ёсць недахопы і як рухацца наперад.
Цяпер сістэма кіравання краінай выглядае наступным чынам:
ўрад адказвае за эканоміку,
ідэалогія, кадры, кантроль і падрыхтоўка законаў – за адміністрацыяй прэзідэнта,
старшыні аблвыканкамаў адказваюць за свае рэгіёны,
гарадскія і раённыя выканкамы працуюць на сваім узроўні.
"Адказныя вызначаны. Калі вы ў мяне спытаеце, ці задаволены я выбудаванай сістэмай функцыянавання кадраў, адразу скажу: не", - цытуе прэзідэнта яго прэс-служба.
Лукашэнка ўдакладніў, што найперш гэта тычыцца адміністрацыі прэзідэнта, хаця за кадры адказваюць усе прысутныя на нарадзе.
"Мы маем прававую базу і добры практычны вопыт. Але час не стаіць на месцы, таму трэба работу ўдасканальваць. Можа быць, і сістэму", - падкрэсліў беларускі лідар.
Фармалізм ёсць, дысцыпліны няма
Беларускі лідар заклікаў кіравацца каласальным савецкім вопытам для замацавання кадраў.
Паводле яго слоў, на жаль, яшчэ ёсць кіраўнікі, якія працуюць па прынцыпе "латання дзіркі". Лукашэнка нагадаў, што яшчэ ў мінулым годзе даручаў укараніць сістэму кадравых перамяшчэнняў ад аблвыканкама да нізавога ўзроўню.
"Аблвыканкамы не працуюць як след, не кантралююць на належным узроўні дзейнасць раённых і гарадскіх выканкамаў. На месцах часта мы бачым шмат фармалізму, элементарную адсутнасць выканальніцкай дысцыпліны", - упэўнены прэзідэнт.
Паводле яго слоў, працягваецца практыка, калі нядбайны кіраўнік з аднаго крэсла перасаджваецца ў іншае. Гэта адбываецца, нягледзячы на прыняцце забароны на такія рашэнні яшчэ ў 2014 годзе.
"Баюся, што калі я, як па ахове здароўя, прайдуся па гэтым пытанні, то, Ігар Пятровіч (Сяргеенка кіраўнік адміністрацыі прэзідэнта - Sputnik), пачынаючы з вас і заканчваючы іншымі, многія з партфелямі растануцца", - папярэдзіў кіраўнік дзяржавы.
Лібералізм замест дзяржаўнага падыходу
На яго думку, пры расставанні з кіраўнікамі, якім нічога не ўдалося, некаторыя кіраўнікі ліберальнічаюць і нават падмяняюць падставы для звальнення. Пасля чаго тыя ўсплываюць на новых пасадах.
"Гэта не дзяржаўны падыход, калі мы пачынаем займацца нейкім лібералізмам. Гэта кругавая парука. І адказнасць тут прамая губернатараў і старшынь гар-, райвыканкамаў", - падкрэсліў Лукашэнка.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Лукашэнка вызваліў ад пасады пасла Беларусі ў Калумбіі
Новы мэр прызначаны ў Гродне – гэта былы міністр ЖКГ
Лукашэнка прызначыў новага дырэктара Белшыны
