Нараджальнасць у Беларусі штогод змяншаецца на 10%
© Sputnik / Илья Питалев
/ Падпісацца
Паводле звестак Белстата, у мінулым годзе насельніцтва краіны зменшылася на 55 тысяч чалавек, па стане на 1 студзеня 2023 года ў рэспубліцы пражывала каля 9,2 млн грамадзян.
МІНСК, 7 кас – Sputnik. На працягу апошніх пяці гадоў нараджальнасць у Беларусі кожны год падае на 10%, заявіла намесніца дырэктара РНПЦ "Маці і дзіця" па акушэрстве і гінекалогіі Алена Гашкевіч.
"Калі казаць пра сухую статыстыку, то мы маем кожны год падзенне нараджальнасці прыблізна на 10%. І ў 2019-м, і ў 2020-м, і ў 2021-м, і ў 2022-м. І ў 2023-м мы чакаем тыя ж мінус 10%", - сказала яна ў эфіры СТБ.
Асноўнай прычынай, паводле яе слоў, стала сітуацыя з каронавірусам.
А вось палітычныя падзеі 2020 года практычна не адбіліся на дэмаграфічнай сітуацыі, падкрэсліла спецыяліст.
"Так, нюансы былі, але глабальна гэта не можа адбіцца на нараджальнасці, таму што ўсё роўна ў краіне была стабільная абстаноўка", - адзначыла Гашкевіч.
Ці дапамагае ЭКА
У праграме экстракарпаральнага апладнення (ЭКА) у Беларусі працуюць два дзяржаўныя цэнтры – у Мінску і Гомелі.
"Мы працуем у гэтай праграме ўжо два гады. Старт праграмы ў нас быў у жніўні 2021-га. Усяго звярнуліся 4 200 шлюбных пар, 900 жанчын ужо нарадзілі, з улікам шматплоднай цяжарнасці гэта 1 тысяча народжаных дзяцей. І на сёння ў нас каля 500 пацыентак цяжарныя. Гэта я кажу сумарныя даныя па рэспубліцы", - прывяла лічбы загадчыца аддзялення дапаможных рэпрадуктыўных тэхналогій РНПЦ "Маці і дзіця" Ірына Дусь.
Гашкевіч дадала, што праграмы ЭКА існуюць у краіне 20 гадоў. За гэты час дзякуючы ім на свет з’явілася больш за 10 тысяч дзяцей.
Насельніцтва скарачаецца
Паводле звестак Белстата, у 2022 годзе насельніцтва краіны зменшылася на 55 тысяч чалавек, па стане на 1 студзеня 2023 года ў рэспубліцы пражывала каля 9,2 млн грамадзян.
Акрамя таго, у Беларусі з’явіліся рэгіёны, дзе менш за 1 мільён жыхароў, чаго раней не назіралася – гэта Гродзенская (998 тысяч) і Магілёўская вобласці (989 тысяч).
На думку прэзідэнта Аляксандра Лукашэнкі, самая вялікая праблема для краіны зараз ужо не эканамічная, а дэмаграфічная.
У 2022 годзе эксперты ЕАЭС канстатавалі, што ў цэлым дэмаграфічная сітуацыя ў краінах "пяцёркі" блізкая да катастрофы.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Ордэнам Маці ўзнагароджаны 65 жанчын Беларусі
Жыллё перад купляй за сямейны капітал будзе правяраць камісія
Пытанні паляпшэння дзяржпадтрымкі сям’і абмеркавалі ў Мінску
