МІНСК, 21 мая — Sputnik. Беларусь увайшла ў топ-10 самых дружалюбных для крыптавалют краін, згодна з пададзеным напярэдадні канферэнцыі BlockShow Europe 2018 рэйтынгам.
Галоўная канферэнцыя ў сферы тэхналогіі блокчэйн і крыптавалют пройдзе ў канцы мая ў Берліне. Напярэдадні правядзення мерапрыемства арганізатары апублікавалі рэйтынг найбольш дружалюбных да крыптавалют дзяржаў кантынента.
Першы радок у рэйтынгу заняла Швейцарыя. У тройку лідэраў таксама ўвайшлі Гібралтар і Мальта.
Далей у спісе ідуць Вялікабрытанія, Данія, Германія, Партугалія, Нідэрланды і Фінляндыя. Замыкае дзясятку Беларусь.
У канцы снежня 2017 года прэзідэнт Беларусі Аляксандр Лукашэнка падпісаў дэкрэт "Аб развіцці лічбавай эканомікі". Апроч іншага, дакумент уводзіць у прававое поле крыптавалюты і тэхналогію блокчэйн: кампаніям дазволена заключаць smart-кантракты, а выручка ад аперацый з крыптавалютамі не абкладаецца падаткамі да 2023 года.