МІНСК, 30 ліп — Sputnik. Хакеістаў, якія адмовіліся ад выступу за зборную Беларусі і прынялі расійскае спартыўнае грамадзянства, можна зразумець, заявіў галоўны трэнер нацыянальнай каманды Андрэй Сідарэнка.
У 2015 годзе беларускія хакеісты сталі лічыцца легіянерамі ў КХЛ. З тых часоў шэраг гульцоў нацыянальнай каманды прынялі рашэнне змяніць грамадзянства на расійскае. Сярод іх Андрэй Стась, Мікіта Камароў, Ілля Шынкевіч, Мікалай Стасенка і іншыя.
"У нас ёсць адмоўнікі. Да канца жніўня іх статус у КХЛ вызначыцца. Абяцаюць, што яны не будуць з'яўляцца легіянерамі і змогуць гуляць за зборную. Дрэнна, што хакеісты з'язджаюць. З іншага боку іх можна зразумець — там у іх больш выгадныя кантракты", — сказаў Сідарэнка на прэс-канферэнцыі ў Мінску ў панядзелак.
Ён адзначыў, што раней атрымаць выклік у зборную было ганарова, гульцы адчувалі пачуццё патрыятызму. "Хацелася б такое стаўленне ад нашых хакеістаў", — сказаў ён.
Разам з тым Сідарэнка дадаў, што дзверы ў нацыянальную каманду для адмоўнікаў не зачыненыя. "Мы будзем з усімі размаўляць, будзем сачыць, як яны выступаюць", — удакладніў спецыяліст.
Рашэнне аб змене грамадзянства, прынятае раней, па словах Сідарэнкі, у выпадку неабходнасці не будзе перашкодай для выкліку ў галоўную каманду краіны. "Мы павінны знайсці агульную мову", — сказаў на заканчэнне Сідарэнка.
Нагадаем, Сідарэнка ўзначаліў зборную Беларусі ў чэрвені. Раней ён ужо працаваў галоўным трэнерам нацыянальнай каманды — з 1994 па 1996 год.