МІНСК, 19 кра - Sputnik. У Беларусі дзве дзяржаўныя мовы - руская і беларуская, сказаў прэзідэнт Аляксандр Лукашэнка падчас штогадовага паслання парламенту і народу.
"Зноў пайшла гэтая моўная хваля. Не падымайце гэтае пытанне", - запатрабаваў Лукашэнка, каментуючы знікненне ў Беларусі шыльдаў на рускай мове і замену іх на беларускамоўныя шыльды. Гэта выклікала незадаволенасць у расіян, адзначыў прэзідэнт.
Лукашэнка выказаўся метафарычна - ён мяркуе, што са стратай рускай мовы беларус губляе розум, а са стратай беларускай губляе яшчэ і сэрца. І звярнуўся з пытаннем: вы хочаце страціць розум ці сэрца?
"У нас дзве дзяржаўныя мовы. Руская і беларуская. Не ўкраінская, не расійская - руская, у якую мы душу ўклалі. <...> Людзі гінулі, разам з рускімі людзьмі ваявалі. Гэта наш агульны здабытак", - лічыць Лукашэнка.
Прэзідэнт застаўся незадаволены тым, што шыльду "Выконвайце хуткасны рэжым" на дарозе вырашылі перавесці на беларускую мову.
"Мне як беларусу зразумела, што хацеў сказаць аўтар. Едзе рускі чалавек або рускамоўны беларус. Выконвай? Хуткасны? Але зразумеў, што рэжым. Няўжо зноў дыктатура Лукашэнкі? Вось ён тут едзе і "рэжым" напісаны", - кажа прэзідэнт.
Ён мяркуе, што зразумець гэтую шыльду змогуць каля 50% насельніцтва. Але астатнія могуць няправільна перавесці.
"Хто зразумее, што гэта хуткасны рэжым, а не дыктатура Лукашэнкі?" - задаецца пытаннем кіраўнік дзяржавы.
Sputnik вядзе тэкставую анлайн-трансляцыю штогадовага паслання прэзідэнта.