Як аб'яднаць жыхароў беларускай вёскі? Як даць адчуць нашым старым, што яны жывыя і патрэбныя? Дзе паслухаць іх апавяданні і народныя песні, у якіх уся глыбіня нашай гісторыі?
Дзеля гэтага самі мясцовыя жыхары, зацікаўленыя ў развіцці сваёй вёскі, пад кіраўніцтвам Сяргея Выскваркі - этнахарэографа, кіраўніка фальклорнага ансамбля "Верабейкі" з Любані арганізоўваюць сабе ўжо чацвёрты год запар свята-фестываль "У Пласток на квасок" - свята традыцыйнай народнай стравы".
У гэтым годзе свята адбылося ў нядзелю 8 жніўня ў вёсцы Пласток Любанскага раёна Мінскай вобласці на "Сядзібе Паўла i Марылі", у якой раней жылі прадзеды Сяргея Выскваркі.
Свята пачалося з тэматычнага шэсця.
Чатыры старэйшыя носьбіткі мясцовых кулінарных традыцый падрыхтавалі дэгустацыю-конкурс мясцовага прадукту "Квас з прыкрасамі".
Амаль кулінарным брэндам дадзенай мясцовасці з'яўляецца такі своеасаблівы гарачы грыбны суп: ён рыхтуецца на бочкавым капусным расоле з дадаткам пярлоўкі і сушаных грыбоў у печы.
Хтосьці дадае крыху капусты, хтосьці мяса, хтосьці рыбы або гатуе посны суп.
Густ атрымліваецца такі своеасаблівы - квасны, рэзкавата-кіслы і вельмі смачны!
На вялікіх сталах пяць мясцовых гаспадынь (Раіса Мікалаеўна Кагадоўская, Аляксандра Мікалаеўна Кісялёва, Вольга Паўлаўна Глазун, Валянціна Аляксандраўна Янкоўская, Ніна Уладзіміраўна Маладзянава) падрыхтавалі чыгуны дадзенага "квасу" - кожная па сваім рэцэпце. У гэтым годзе на чале журы была этнограф Ларыса Мятлеўская.
Усе былі проста ў захапленні ад пачастунка. Пераможцу не абралі - ўзнагародзілі ўсіх.
Былi i блiны - галоўны пачастунак для дзяцей.
Потым выступалi сябры - фальклорныя калектывы Любанскага раёна.
Фальклорны гурт "Беражніца" ст. Пласток, "Чуткі" ст. Камуна, "Напарачка" Любань, "Павалякі" ст. Обчын, вакальны гурт "Любанскі гармонік".
И ўсё гэта пад музычным суправаджэннем прыгожага дуэта любанскіх музыкаў Васіля Семашкевіча і Мікалая Юнiцкага.
"Танцы пад гармонiк" - вечарынка на вясковай вулiцы.
Да вечара жыхары вёскі святкавалi фэст "У Пласток на квасок".