МІНСК, 25 кас - Sputnik. Асноўныя акцыянеры Белгазпрамбанка - "Газпром" і расійскі Газпрамбанк - пралангавалі прадастаўлены ў роўных далях субардынаваны крэдыт на агульную суму 4,96 млрд расійскіх рублёў, паведаміла прэс-служба беларускай фінансавай установы.
Гэтае рашэнне дазволіць Белгазпрамбанку захаваць нарматыўны капітал на належным узроўні для далейшай падтрымкі прадпрыемстваў, арыентаваных на расійскі рынак, што прывядзе да ўмацавання знешнегандлёвых сувязяў паміж Беларуссю і Расіяй.
Крэдыт прыцягнуты ў пачатку 2015 года
Як патлумачылі Sputnik ў прэс-службе Белгазпрамбанка, доўгатэрміновы субардынаваны крэдыт быў прыцягнуты ў студзені 2015 года. Сума выдадзеных сродкаў у расійскіх рублях на той момант была эквівалентная 150 мільёнам долараў ЗША (па курсе на 15 студзеня 2015 года).
Субардынаваны крэдыт не ўтрымлівае умоў аб мэтавым выкарыстанні, не прадугледжвае капіталізацыю працэнтаў, а таксама павінен адпавядаць шэрагу іншых устаноўленых рэгулятарам умоў.
Ён прыцягваецца на тэрмін не менш за 5 гадоў і не можа быць запатрабаваны крэдыторам да заканчэння перыяду дзеяння дагавора, калі пазычальнік не парушае яго ўмовы. А выплата асноўнай сумы доўгу ажыццяўляецца адным плацяжом, калі скончыцца тэрмін дзеяння дагавора.
Крэдытная лінія
У лютым 2021 года расійскі Газпрамбанк адкрыў для беларускай "дачкі" доўгатэрміновую крэдытную лінію на 60 млн еўра для фінансавання малога і сярэдняга бізнесу на прывабных умовах.
Такая форма падтрымкі ад матчынай структуры з`явілася пасля аднаўлення аперацыйнага кантролю акцыянераў над дзейнасцю беларускага банка.
Справа Белгазпрамбанка
Нацбанк Беларусі ўвёў часовую адміністрацыю ў Белгазпрамбанку з 15 чэрвеня 2020 гады пасля таго, як фінансавая міліцыя прыйшла ў банк з ператрусамі, і была ўзбуджана крымінальная справа за атрыманне хабараў, ухіленне ад выплаты падаткаў і "адмыванне" грошай, атрыманых злачынным шляхам. Праз некалькі дзён быў затрыманы экс-кіраўнік банка Віктар Бабарыка і некалькі яго намеснікаў. У студзені 2021 года старшынёй праўлення банка была прызначана Надзея Ермакова, але затым яна перайшла ў назіральны савет банка.
Раней тое, што адбываецца ў Белгазпрамбанку, пракаментавалі асноўныя акцыянеры - Газпрам і Газпрамбанк. У сумесным рэлізе кампаніі заявілі аб супрацьзаконным назначэннi часовай адміністрацыі і аб парушэнні ўладамі Беларусі як беларускага заканадаўства, так і дамоваў ЕАЭС.
Чытайце таксама:
Ермакова пакідае пасаду кіраўніка праўлення Белгазпрамбанка
Белгазпрамбанк страціў актывы на 230 млн рублёў
Вярхоўны суд Беларусі прыгаварыў Бабарыку да 14 гадоў пазбаўлення волі