МІНСК, 30 сне – Sputnik. Аб'ём тавараабароту паміж Расіяй і Беларуссю павялічыўся ў 2021 годзе больш як на 35%, нягледзячы на пандэмію, паведаміў расійскі прэзідэнт Уладзімір Пуцін на сустрэчы са сваім беларускім калегам Аляксандрам Лукашэнкам.
У паўночнай сталіцы Расіі ў аўторак прайшоў вялікі саміт кіраўнікоў дзяржаў-удзельніц СНД. У сераду адбылася сустрэча Пуціна і Лукашэнкі, на якой быў абмеркаваны актуальны беларуска-расійскі парадак дня.
Размова на сустрэчы двух прэзідэнтаў у тым ліку ішла і аб тэме гандлёва-эканамічнай кааперацыі.
"На жаль, у пандэмійны 2020 год у нас адбыўся спад у аб'ёме тавараабароту – амаль 17%. Затое ў гэтым годзе амаль 36% рост. Гэта значыць, мы пакрылі ўсё, што страцілі... і дабавілі амаль у два разы", - сказаў Пуцін.
Пуцін падзякаваў калегам з урадаў Расіі і Беларусі за работу ў гэтым напрамку і адзначыў, што чакае маштабная работа.
"Намечаны значныя планы па рэалізацыі нашага ўзаемадзеяння", - сказаў расійскі прэзідэнт.
Пуцін таксама выказаў словы падзякі беларускаму калегу за падтрымку гэтых працэсаў.
"Спадзяюся, што будзем таксама прадуктыўна супрацоўнічаць і ў надыходзячым 2022 годзе", - сказаў Пуцін.
Размова прэм'ераў
Тэму паглыблення беларуска-расійскай інтэграцыі абмеркавалі ўчора і прэм'еры дзвюх краін.
Як паведаміла прэс-служба Савета міністраў Беларусі, Раман Галоўчанка і Міхаіл Мішусцін падчас тэлефоннай размовы абмеркавалі ход рэалізацыі пакета інтэграцыйных дакументаў у рамках Саюзнай дзяржавы і паглыблення прамысловай кааперацыі.
Была закранута актуальная тэма росту тавараабароту паміж краінамі ў адыходзячым годзе.
Кіраўнікі ўрадаў таксама абмеркавалі шырокае кола пытанняў двухбаковага ўзаемадзеяння дзяржаў, у тым ліку ход рэалізацыі пакета інтэграцыйных дакументаў, прынятых 4 лістапада 2021 года. Таксама размова ішла аб пашырэнні імпартазамяшчэння.
Галоўчанка і Мішусцін падкрэслілі, што існуючы канструктыўны характар двухбаковага ўзаемадзеяння ў далейшым будзе толькі ўмацоўвацца.
Чытайце таксама:
Вызначаны памер бюджэту Саюзнай дзяржавы на наступны год
Што будзе з беларускім рублём і эканомікай у 2022-м – прагноз ЕАБР
Чарвякоў: імпартазамяшчэнне дазваляе змагацца з наступствамі санкцый