МІНСК, 5 сту – Sputnik. Лідар беларускай каманды "МАЗ-СПОРТаўта" Сяргей Вязовіч не глядзіць "Дакар", але за вынікамі сочыць, пра гэта ён расказаў карэспандэнту Sputnik.
Вязовіч лічыць, што, хаця ралі-рэйд завершыцца толькі 14 студзеня, пераможца ў заліку грузавікоў ужо вядомы.
"Я магу сказаць загадзя, што будзе на фінішы, за чым там сачыць: першыя чатыры месцы зойме "КАМАЗ-мастер". На сёння там няма канкурэнтаў, якія могуць навязаць ім барацьбу", – сказаў Sputnik Вязовіч.
Аб падтрымцы
На пытанне карэспандэнта Sputnik, ці падтрымалі беларускую каманду пасля таго, як яе не дапусцілі да ралі-рэйду, Вязовіч адзначыў, што не надта.
"Акрамя пастоў у сацсетках, іншай, рэальнай падтрымкі не было. Каманды актыўна пісалі ў сябе на старонках, а вось каб хтосьці кудысьці пісьмова звярнуўся, такога не было", - растлумачыў ён.
Ён растлумачыў гэта тым, што гоншчыкі рыхтуюцца да гэтага старту цэлы год і не гатовы зняцца з гонкі ў падтрымку беларусаў, прапусціць "Дакар" і страціць стартавы ўзнос.
Раней кіраўнік расійскай каманды "КАМАЗ-мастер" Уладзімір Чагін заявіў, што шкадуе аб нядопуску "чырвоных зуброў" да старту "Дакара-2022". Ён адзначыў, што сітуацыя, калі палітыка ўрываецца ў спорт, непрыемная.
"Вельмі шкада беларускую каманду МАЗ. Мы даўно сябруем з імі, нас шмат што звязвае. Калі даведаліся, што іх не дапусцілі да "Дакара", зведалі сум. Спадзяюся, што гэты палітычны туман хутка развеецца", – сказаў Чагін.
Узнос не вярнулі
Стартавы ўзнос беларускай каманды на "Дакар" з-за санкцый Захаду ў дачыненні да Беларусі, які вылічаецца ў сотнях тысяч еўра, у выніку быў замарожаны. Прычым каманда "МАЗ-СПОРТаўта", мяркуючы, што з-за рэстрыкцый могуць быць праблемы, заяўлялася ад Беларускай аўтамабільнай федэрацыі, і выплачаны ўзнос прайшоў узгадненне еўрапейскіх інстанцый.
"Узнос Беларускай аўтамабільнай федэрацыі пакуль не вярнулі", - удакладніў лідар беларускай каманды.
Што далей?
Пакуль, як раней і прагназіраваў Вязовіч, чатыры першыя месцы ў генеральнай класіфікацыі "Дакара" ўтрымліваюць расіяне. "МАЗ-СПОРТаўта" ж актыўна рыхтуецца да іншай гонкі.
У 2022 годзе ралі "Золата Кагана" будзе праходзіць у рамках "Шаўковага шляху", туды і збіраюцца беларусы. На дадзены момант гэта галоўны старт "чырвоных зуброў".
Гібрыдны МАЗ?
Арганізатары "Дакара" ўжо аб'явілі, што ў 2026 годзе ўступае ў сілу новы рэгламент: тыя, хто раней дабіваўся поспеху на ралі-рэйдзе, змогуць удзельнічаць у гонцы толькі на электрамабілях, гібрыдах або на машынах на вадародным паліве. Sputnik у сувязі з гэтым спытаў, ці працуе "МАЗ-СПОРТаўта" над стварэннем такога грузавіка.
Вязовіч звярнуў увагу на тое, што машыны каманды мадэрнізуюцца кожны год, але дакладных планаў па гібрыдзе пакуль няма.
"Нам у гэтым годзе трэба прайсці амалагацыю FIA, без яе не зможам нідзе ўдзельнічаць. Таксама мы задумваліся аб гібрыдным грузавіку, але пакуль работ у гэтым напрамку не вядзем", – рэзюміраваў ён.
МАЗы на "Дакары"
"МАЗ-СПОРТаўта" ўдзельнічае ў "Дакары" з 2012 года, і апошнія гады пастаянна змагаецца за прызавыя месцы. Лепшыя вынікі каманды гэта "серабро" (2018) і "бронза" (2020) яе лідара Сяргея Вязовіча.
У гэтым годзе "чырвоныя зубры" цалкам перайшлі на грузавікі новай генерацыі і заяўлялі аб планах выступаць у "Дакары-2022" на трох каміёнах капотнай кампаноўкі, якія добра зарэкамендавалі сябе ў мінулых гонках.
Таксама на Sputnik:
Поўная нечаканасць: Вязовіч аб сітуацыі з "МАЗ-СПОРТаўта" і "Дакарам"
Прагрэс ідзе, далей - толькі перамога: Вязовіч пракаменціраваў "Дакар-2021"
Вязовіч распавёў Галоўчанку, як збіраюць гоначныя МАЗы - відэа