Місія міратворцаў у Казахстане завершана – Такаеў

МІНСК, 11 сту – Sputnik. Асноўная місія міратворчых сіл АДКБ у Казахстане паспяхова завершана, заявіў прэзідэнт рэспублікі Касым-Жамарт Такаеў, выступаючы ў аўторак перад дэпутатамі парламента.

Паводле яго слоў, выводзіць міратворчы кантынгент з Казахстана пачнуць праз два дні, усяго зойме гэта не больш за 10 дзён.

Прэзідэнт падкрэсліў, што вострая фаза контртэрарыстычнай аперацыі ў краіне пройдзена, абстаноўка ва ўсіх рэгіёнах стабільная.

Напярэдадні дзяржсакратар Савета бяспекі Беларусі Аляксандр Вальфовіч заявіў, што пасля заканчэння аперацыі ў Казахстане ўсе міратворцы сіл АДКБ вернуцца ў месцы сваёй пастаяннай дыслакацыі.

Не застануцца ў Казахстане і беларускія вайскоўцы, якія ўзялі пад ахову два аб'екты – арсенал артылерыйскіх боепрыпасаў у пасёлку Капчагай і ваенны аэрадром "Жэтыген".

"Адправілі туды найбольш падрыхтаваных, навучаных гэтаму (правядзенню міратворчых місій - Sputnik) нашых вайскоўцаў, якія ўдзельнічалі штогод у розных вучэннях", - адзначаў дзяржсакратар Савета бяспекі.

Сітуацыя ў Казахстане абвастрылася 2 студзеня, калі ў Жанаозене пачаліся мітынгі супраць рэзкага павышэння цэн на звадкаваны газ. Потым яны перараслі ў масавыя пратэсты па ўсёй краіне з эканамічнымі і палітычнымі патрабаваннямі.

Масавыя сутыкненні пратэстоўцаў з сілавікамі разгарнуліся ў найбуйнейшым горадзе краіны – Алматы. Марадзёры грабілі крамы, палілі адміністрацыйныя будынкі і аўтамабілі, учынялі перастрэлкі. Таксама быў захоплены аэрапорт горада і некалькі іншых важных аб'ектаў.

Аднак неўзабаве вайскоўцы правялі зачыстку і вярнулі пад дзяржаўны кантроль паветраную гавань. У выніку беспарадкаў па краіне – дзесяткі загінуўшых і тысячы пацярпеўшых. У краіне ўвялі рэжым надзвычайнага становішча, ён будзе дзейнічаць да 19 студзеня.