Мінск рыхтуецца да хвалі дзіцячага і падлеткавага захворвання на "амікрон"

МІНСК, 14 сту - Sputnik. Установы аховы здароўя сталіцы рыхтуюцца да хвалі дзіцячага і падлеткавага захворвання варыянтам каронавіруса "амікрон", перадае агенцтва "Мінск-Навіны".

"Пік захворвання, хутчэй за ўсё, прыйдзецца на канец студзеня — пачатак лютага. Уздым захворвання — з наступнага тыдня. У дзяцей і падлеткаў будуць назірацца дастаткова складаныя наступствы: трахеабранхіты і інфекцыі верхніх дыхальных шляхоў. Чуткі пра "лёгкі штам" — памылковыя", — гавораць медыкі.

У Мінгарвыканкаме агенцтву пацвердзілі, што ўжо зараз дзіцячыя паліклінікі рыхтуюцца да значнага росту колькасці пацыентаў. Урачы раяць бацькам паклапаціцца аб вакцынацыі сваіх дзяцей, удзяляць асаблівую ўвагу іх здароўю, прытрымлівацца масачнага рэжыму і іншых супрацьэпідэмічных мер.

Паводле прагнозаў беларускага інфекцыяніста, загадчыка кафедры інфекцыйных хвароб і дзіцячых інфекцый БелМАПА Юрыя Горбіча, рост захворвання на каронавірус у Беларусі можа пачацца з канца студзеня-пачатку лютага.

Цяпер жа сітуацыя з COVID-19 хоць і адчувальная, але не цяжкая. Тым не менш, на выпадак росту хворых знаходзяцца ў пастаяннай гатоўнасці, у тым ліку работнікаў дарослых стацыянараў на ўсялякі выпадак рыхтуюць да работы з дзіцячым насельніцтвам - бо новы штам "амікрон" значна "памаладзеў".

Гаворачы аб сітуацыі з гэтым варыянтам каронавіруса ў нашай краіне, Юрый Горбіч адзначыў, што колькасць тых, хто заразіўся "амікронам", вядома, значна большая, чым была на канец снежня, калі ў краіне выявілі першых яго носьбітаў. Ёсць выпадкі і ў рэгіёнах, а таксама і ў дзяцей.

Прышчэпліваць падлеткаў (ад 12 да 17 гадоў) ад каронавіруса ў Беларусі пачалі 27 снежня.

Намеснік міністра аховы здароўя - галоўны дзяржаўны санітарны ўрач Аляксандр Тарасенка заявіў, што ў гэтую хвалю каронавірус "памаладзеў", хварэе ўсё больш дзяцей. Ён не адмаўляе магчымасці зніжэння ўзроставай планкі ў вакцынацыі дзяцей у найбліжэйшай будучыні.

Па дадзеных Міністэрства аховы здароўя на 11 студзеня, у Беларусі адну дозу вакцыны ад каронавіруса атрымалі больш за 7,5 тысячы падлеткаў ва ўзросце 12-17 гадоў.