Збеглы ў Беларусь польскі салдат звярнуўся ў Гаагскі трыбунал

МІНСК, 29 сту – Sputnik. Збеглы ў Беларусь польскі салдат Эміль Чэчка, які папрасіў у краіне прыстанішча, заявіў, што падаў заяву ў Гаагскі трыбунал, паведаміў у суботу праваабарончы цэнтр "Сістэмная праваабарона".

Раней у студзені цэнтр, які прадстаўляе інтарэсы паляка ў Беларусі, праінфармаваў, што заява ўжо падрыхтавана і накіравана пракурору міжнароднага крымінальнага суда ў Гаазе – у ёй змяшчаецца прашэнне ўзбудзіць справу за злачынствы супраць чалавечнасці ў дачыненні да Польшчы і Літвы, за дзеянні супраць бежанцаў. Пры гэтым Чэчка ў дакументах заяўлены як сведка.

Ён таксама выказаў спачуванні ў сувязі з гібеллю 22-гадовага польскага ваеннаслужачага на мяжы з Беларуссю, які, паводле папярэдніх дадзеных, здзейсніў самагубства.

"Служба ў польскім войску і задачы, якія апошнім часам ставяцца перад салдатамі, з’яўляюцца псіхалагічна складанымі і часта немагчымымі для выканання без таго, каб не пакінуць след на здароўе", - сказаў Чэчка.

Інфармацыя пра тое, што польскі вайсковец перайшоў мяжу і папрасіў палітычнага прыстанішча ў нашай рэспубліцы, з’явілася 17 снежня.

Потым Чэчка даў шэраг інтэрв’ю дзяржСМІ. Ён паведаміў шакавальныя факты аб забойствах мігрантаў на мяжы польскімі пагранічнікамі. Таксама вайсковец прызнаўся, што і сам страляў у бежанцаў.

Генпракурор Беларусі Андрэй Швед заяўляў, што інфармацыю аб дзеяннях Польшчы супраць мігрантаў Мінск накіруе ва ўсе міжнародныя арганізацыі.

Пракуратура Беластока ўзбудзіла крымінальную справу ў дачыненні да Чэчкі, яму пагражае ад года да дзесяці гадоў пазбаўлення волі. Сам вайсковец казаў, што ў Польшчы яму пагражае смерць.