Першыя старты: Алімпіяда-2022 у Пекіне пачнецца ўжо ў сераду

МІНСК, 2 лют – Sputnik. Першыя спаборніцтвы на Алімпіядзе ў Пекіне пройдуць 2 лютага.

Першаадкрывальнікамі, згодна з раскладам, значацца саначнікі, але іх заезды ў гэты дзень будуць трэніровачныя. Яны пачнуцца ў 19:30 па пекінскім часе (14:30 па мінскім).

А вось афіцыйныя спаборніцтвы (кваліфікацыйныя) стартуюць у сераду ў керлінгістаў: у дабл-міксце пройдуць чатыры паядынкі, пачнуцца яны адначасова ў 20:05 (15:05).

Энтузіясты называюць кёрлінг "шахматамі на лёдзе". У гэтай разнавіднасці не дзесяць, а восем раўндаў (эндаў), пры неабходнасці гуляецца вырашальны. Кожная змешаная пара выконвае пяць спроб за энд. Адзін гулец штурхае першы і апошні камень, другі – астатнія.

У пачатку адна з каманд павінна ўсталяваць "стацыянарны" камень у гульнявой зоне (своеасаблівай мішэні): альбо ў якасці ахоўнага, альбо за спецыяльнай лініяй, каб цэнтр "дома" застаўся адкрытым. Канкурэнты, адпаведна, выбіраюць становішча, пакінутае вольным.

Галоўная задача каманды – "паставіць" камяні бліжэй да цэнтра "мішэні", чым сапернік.

Зімовыя Гульні-2022 працягнуцца да 20 лютага. У 15 відах спорту разыграюць 109 камплектаў узнагарод – на 7 больш, чым чатыры гады таму, за кошт уключэння новых дысцыплін: жаночыя адзіночныя спаборніцтвы па бабслеі, мужчынскія і жаночыя спаборніцтвы па фрыстайле "біг-эйр", змешаныя камандныя турніры ў лыжнай акрабатыцы і сноуборд-кросе, камандны мікст у скачках на лыжах з трампліна, змешаная эстафета ў шорт-трэку.

Пекін стане першым горадам, які арганізуе і летнюю, і зімовую Алімпіяды.

На Алімпіядзе ў Пекіне выступяць 29 беларускіх спартсменаў (чатыры гады таму ў Пхенчхане было 33). Асноўныя медальныя планы звязаны з лідарамі біятлоннай зборнай, гэта Дзінара Алімбекава, Ганна Сола і Антон Смольскі. Таксама традыцыйна надзеі ўскладаюцца на фрыстайлістаў: Ганна Гуськова выйдзе на старт у рангу алімпійскай чэмпіёнкі Гульняў-2018.

На мінулай зімовай Алімпіядзе ў Пхенчхане беларусы заваявалі два "золата" (Ганна Гуськова ў фрыстайле і Дар'я Домрачава, Надзея Скардзіна, Ірына Крыўко і Дзінара Алімбекава ў біятлоннай эстафеце) і "серабро" (Дар'я Домрачава ў мас-старце).