МІНСК, 3 лют – Sputnik. Літоўскі ўрад напярэдадні на пасяджэнні вырашыў прыпыніць з 5 лютага ў краіне дзеянне COVID-сертыфікатаў.
Такім чынам, кабінет міністраў Літвы пагадзіўся з прапановай Міністэрства аховы здароўя. Пры гэтым у медыцынскім ведамстве не выключылі, што выкарыстанне Opportunity Passport у рэспубліцы могуць ізноў аднавіць.
"З улікам тэндэнцый, якія бачым і ў свеце, і ў Еўропе, улічваючы, як штам "амікрон" паводзіць сябе ў Літве, мы бачым, што рызыка захварэць ёсць як у прышчэпленых, так і ў непрышчэпленых", – заявіў міністр аховы здароўя Літвы Арунас Дулькіс.
Ён таксама адзначыў, што ў залежнасці ад эпідэміялагічнай сітуацыі пры неабходнасці ўрад можа абмеркаваць вяртанне да гэтай абмежавальнай меры.
"Пашпарт магчымасцей" (Opportunity Passport) у Літве выдаваўся прышчэпленым ад COVID-19 або тым, хто перахварэў на каронавірус.
Дакумент дае магчымасць наведваць гандлёвыя цэнтры, салоны прыгажосці, рэстараны і кафэ, а таксама грамадскія мерапрыемствы, якія праводзяцца ў памяшканнях.
У лістападзе літоўскі ўрад прыняў рашэнне з 28 снежня выдаваць "пашпарт" грамадзянам, якім ужо споўнілася 12 гадоў. Пры гэтым дакумент быў неабходны для забаўляльнай сферы, але не для ўстаноў адукацыі.
Цяпер у Літве праходзіць кампанія па вакцынацыі насельніцтва. Усе літоўцы старэйшыя за 5 гадоў могуць атрымаць бясплатную вакцыну супраць COVID-19 у бліжэйшым цэнтры першаснай медыка-санітарнай дапамогі (амбулаторыі), а таксама ў некаторых аптэках. Па дадзеных медыкаў, сярод шпіталізаваных асоб 70% - непрышчэпленыя, а 80% хворых на каронавірус - грамадзяне ва ўзросце 50 гадоў і старэй.
Чытайце таксама:
У Беларусі звыш 35 тысяч дзяцей прышчэплены ад каронавіруса
Мінздароўя заявіла аб гатоўнасці да росту выпадкаў "амікрона"
Што рабіць пры каронавірусе - новая памятка Міністэрства аховы здароўя Беларусі
Беларуская вакцына ад COVID-19 не выклікае пабочных з'яў - Гусакоў
Доктар назваў сімптом, які дазваляе выявіць "амікрон" да тэсту на COVID-19