Беларусь ставіць новы антырэкорд па колькасці захварэлых на COVID-19

МІНСК, 5 лют – Sputnik. У Беларусі зноў устаноўлены рэкорд хворых на COVID-19 за суткі, аб гэтым сведчаць дадзеныя Міністэрства аховы здароўя рэспублікі, апублікаваныя ў суботу.

З пачатку пандэміі ў краіне былі зарэгістраваны 769 076 чалавек са станоўчым тэстам на каронавірус. Пры гэтым ачунылі 757 436 пацыентаў, у якіх раней быў пацверджаны дыягназ COVID-19.

Як паведамляе Міністэрства аховы здароўя, за мінулыя 24 гадзіны зарэгістраваны 8 231 пацыент з каронавіруснай інфекцыяй. Папярэдні максімальны паказчык быў зафіксаваны ў мінулую пятніцу – 7 350.

З медустаноў за мінулыя суткі выпісаны 1 248 чалавек.

За час пандэміі ад каронавіруса ў краіне памерлі 6 132 чалавекі (16 за мінулыя суткі).

Усяго ў краіне праведзена 11 909 629 тэстаў, у тым ліку 38 828 за апошнія 24 гадзіны.

Міністр аховы здароўя Дзмітрый Піневіч раней заявіў, што панікаваць у існуючай сітуацыі не трэба. Ён адзначыў, што Міністэрства аховы здароўя прагназавала ўзрыўны рост захворвання на COVID-19 у сувязі з новым штамам "амікрон", які, мяркуючы па даследаваннях, ужо выцесніў "дэльту".

Пры гэтым кіраўнік профільнага ведамства адзначыў нязначны рост шпіталізацый, паколькі, паводле яго слоў, "амікрон" рэдка пераносіцца ў цяжкай форме. На фоне такога ўздыму Міністэрства аховы здароўя выпусціла шэраг загадаў.

У прыватнасці, студэнтам шостых курсаў медыцынскіх ВНУ, якіх прыцягнулі да працы ў паліклініках, дазволілі афармляць пацыентам бальнічныя. А ўрачы зараз могуць ставіць дыягназ "каронавірус" толькі на падставе клінічных і/або рэнтген-тамаграфічных дадзеных – без правядзення ПЦР.

У працадаўцаў таксама ёсць магчымасць вызваляць хворага супрацоўніка ад працы да трох дзён без афармлення бальнічнага.