Мама Смольскага і першы трэнер: верылі, што будзе медаль

МІНСК, 8 лют – Sputnik. Маці беларускага біятланіста Антона Смольскага, які ў аўторак заваяваў медаль у індывідуальнай гонцы на Алімпіядзе ў Пекіне, расказала Sputnik, што верыла ў трыумф сына.

"Я не тое што думала, што будзе медаль, я нават верыла ў гэта! Хоць (для Антона - Sputnik) гэта складаная гонка, не заўсёды атрымлівалася ў яго стральба. Але настроіўся - малайчына - і змог, зрабіў. Гэта была самая складаная гонка, а спрынт ён як семечкі пстрыкае. Усё будзе добра - нават не сумняваюся!" – распавяла Ірына Смольская-Бякешка.

Яна прызналася карэспандэнту Sputnik, што кожную гонку сына глядзіць у жывым эфіры. Для гэтага ёй даводзіцца зрывацца з працы і адкладаць усе справы, каб паспець да пачатку трансляцыі.

"Гляджу заўсёды, гляджу ў прамым эфіры - ніякіх запісаў. Заўсёды хвалююся. Антон у нас баец з дзяцінства. Гэта толькі пачатак, як ён мне сказаў. Цяпер ён заняты - раздае інтэрв'ю - а ўвечары пагаворым з ім. Хваляванняў шмат, вельмі шмат", - прызналася Ірына.

Паводле яе слоў, увесь Капыль (родны горад Антона - Sputnik) стаіць на вушах пасля ашаламляльнага поспеху ў Пекіне.

Трэнер-выкладчык па спорце Капыльскай спецыялізаванай дзіцяча-юнацкай школы алімпійскага рэзерву і першы настаўнік Смольскага Анатоль Сянюк верыў у поспех падапечнага, заявіў ён Sputnik.

Сянюк павіншаваў свайго выхаванца Антона з выдатным вынікам.

"Дзякуй яму за тое, што ён узнімае ўзровень нашага біятлона і на такім узроўні паказвае вынікі. Я ў яго заўсёды верыў, проста перад Алімпіядай я сказаў Антону, што ў яго будзе медаль. Дай бог, каб не апошні, яшчэ чакаюцца гонкі", - эмацыйна адрэагаваў першы трэнер.

Ён расказаў, што Смольскі прыйшоў да яго займацца біятлонам з сябрам у шостым класе.

"Сказаць, каб я разгледзеў у ім талент адразу, - не. Але Антон ставіўся і ставіцца да сваёй справы прафесійна, вывучае не толькі тэхнічныя тонкасці, але і псіхалагічныя, фізіялагічныя. Яго працавітасць, розум і дабрыня - гэта яго галоўныя якасці", - дадаў Сянюк.