Лётчыкі ПКС Расіі нанеслі ўдары па "праціўніку" на палігоне ў Брэсцкай вобласці

МІНСК, 10 лют – Sputnik. У рамках сумеснага вучэння Беларусі і Расіі "Саюзная рашучасць-2022" лётчыкі ПКС РФ на палігоне ў Брэсцкай вобласці адпрацавалі імітацыю знішчэння з паветра ўмоўнага саперніка на зямлі, паведамілі ў расійскім абаронным ведамстве.

Авіяцыйныя ўдары па цэлях былі зроблены з розных відаў манеўру штурмавікамі Су-25, удакладнілі ў Мінабароны.

Вучэнні стартавалі сёння і скончацца 20 лютага. Расійскія вайскоўцы прыбылі на манеўры са сваёй самай сучаснай тэхнікай.

Так, на палігонах – ЗРК С-400 "Триумф", ЗРПК "Панцирь-С1", самалёты Су-30СМ, Су-35С, а таксама шматлікія ўзоры мадэрнізаванай бронетэхнікі.

Акрамя таго, у вучэннях будзе задзейнічаны аператыўна-тактычны ракетны комплекс "Искандер-М". Раней гэтую магутную расійскую зброю можна было ўбачыць у Беларусі толькі на парадах у Мінску ў гонар Дня незалежнасці.

Генеральны сакратар НАТА Йенс Столтэнберг раней заявіў, што бачыць рызыку ў вучэннях Беларусі і Расіі: нібыта манеўры могуць паслужыць маскіроўкай для ўварвання РФ на ўкраінскую тэрыторыю.

Паводле яго слоў, каля меж Украіны ідзе "нарошчванне ваенных сіл" і "паралельна гучыць пагрозлівая рыторыка".

Аднак у Маскве неаднаразова падкрэслівалі, што РФ нікому не пагражае і не плануе ні на кога нападаць. Акрамя таго, Масква не раз адзначала, што заявы аб магчымай агрэсіі – гэта толькі падстава, каб размясціць больш ваеннай тэхнікі НАТА каля расійскіх меж.

У Мінску таксама неаднаразова звярталі ўвагу на тое, што ў сумесных з РФ вучэннях няма нічога надзвычайнага: яшчэ ў канцы мінулага года прэзідэнты дзвюх краін пацвердзілі планы правесці манеўры на беларускай тэрыторыі. Прычым параметры іх правядзення не парушаюць узятыя на сябе Беларуссю і Расіяй міжнародныя абавязацельствы, падкрэсліваў беларускі бок.

Як паведамлялася, асвятляць ход вучэнняў будзе больш за 150 журналістаў і блогераў з Беларусі, Расіі і іншых краін.