МІНСК, 19 сак - Sputnik. Беларусь не плануе размяшчаць на ўласнай тэрыторыі якія-небудзь віды ядзерных узбраенняў, заявіў у інтэрв'ю японскаму тэлеканалу TBS прэзідэнт рэспублікі Аляксандр Лукашэнка.
Паводле яго слоў, такую зброю краіна таксама не збіраецца вырабляць і выкарыстоўваць супраць кагосьці.
"Я не планую размяшчаць тут ядзерную зброю, вырабляць тут ядзерную зброю, ствараць і выкарыстоўваць гэтую ядзерную зброю супраць каго б там ні было. Такога ніколі не было ў планах беларускага кіраўніцтва і ў маіх планах", - сказаў Лукашэнка.
Ён таксама адказаў на пытанне, ці можа ўзнікнуць сітуацыя, калі рэспубліцы давядзецца размясціць ракеты.
"Не, такой сітуацыі, я думаю, не будзе. Я думаю, што і ў Амерыцы, і на Захадзе яшчэ не ўсе ашалелі да такой ступені, каб мы вырашалі гэту праблему праз ядзерную зброю", - паведаміў прэзідэнт.
Ці не?
Пры гэтым беларускі лідэр усё ж дапусціў магчымасць з'яўлення ў рэспубліцы зброі масавага паражэння.
"Калі амерыканцы, Францыя, Брытанія размесцяць ядзерную зброю ў непасрэднай блізкасці да Беларусі, дапусцім, у Польшчы, Літве ці той жа Украіне, то я запатрабую ад Пуціна вярнуць нам тую ядзерную зброю, якую мы калісьці перадалі Расіі", – заявіў ён.
Гісторыя з ракетамі
Нагадаем, раней Лукашэнка ў інтэрв'ю генеральнаму дырэктару МІА "Россия сегодня" Дзмітрыю Кісялёву расказаў, што Беларусь гатова прапанаваць РФ вярнуць ядзерную зброю ў рэспубліку. Падобнае рашэнне можа быць прынята ў якасці кроку ў адказ на размяшчэнне зброі масавага паражэння на ўсход ад тэрыторыі Германіі.
Пазней кіраўнік МЗС Беларусі Уладзімір Макей заявіў, што знаходжанне ў рэспубліцы такіх відаў узбраенняў можа стаць адным з адказаў на дзеянні НАТА ў Польшчы.
Беларусь у пачатку 1990-х гадоў падпісала міжнародную дамову паводле якой абавязалася вывесці ядзерную зброю з уласнай тэрыторыі. Апошнія ядзерныя боегалоўкі пакінулі рэспубліку ў лістападзе 1996 года. Урачыстая цырымонія развітання адбылася на чыгуначнай станцыі пад Лідай.
>>> Самая актуальная інфармацыя аб сітуацыі вакол Украіны - у Telegram-канале Sputnik Беларусь
Чытайце таксама:
Лукашэнка і Пуцін назіралі з Крамля за пускамі балістычных ракет
МЗС РФ назвала домысламі заявы аб размяшчэнні ядзернай зброі ў Беларусі
Перамовы аб размяшчэнні ядзерных сіл Расіі ў Беларусі не вядуцца – Джабараў