Адмена COVID-абмежаванняў: як зараз перасякаць мяжу Беларусі?

МІНСК, 4 кра – Sputnik. Уезд і выезд праз наземныя межы для беларусаў з 3 красавіка зараз абмежаваны не будуць. Ці патрэбны пры гэтым ПЦР-тэсты і як цяпер трапіць у Беларусь у эфіры АНТ расказаў намеснік міністра аховы здароўя - галоўны дзяржаўны санітарны ўрач Беларусі Аляксандр Тарасенка.

Да гэтага пакінуць Беларусь праз наземныя пункты пропуску можна было толькі ў выключных выпадках, не часцей чым раз на тры месяцы. Цяпер такія правілы здымаюцца.

Пры гэтым іншаземцы, якія прыбываюць у Беларусь, пры ўездзе павінны будуць прад'явіць адмоўны ПЦР-тэст на каронавірус. Беларусаў такая норма не будзе датычыць. Акрамя таго, ПЦР не спатрэбіцца для грамадзян Расіі і Украіны, якія прыбываюць у Беларусь па гуманітарных калідорах.

29 кастрычніка 2020 года Беларусь часова абмежавала ўезд у краіну праз наземныя межы з Латвіі, Літвы, Польшчы і Украіны. Пазней, 10 снежня 2020-га стала вядома, што Беларусь мае намер закрыць наземныя межы на выезд, тлумачачы гэта сітуацыяй з каронавірусам. Рашэнне набыло моц праз 10 дзён.

З таго часу пакінуць краіну можна было толькі ў выключных выпадках, напрыклад, з-за хваробы ці смерці сваяка за мяжой, для атрымання медыцынскай дапамогі. Можна было выехаць да месца пастаяннага пражывання (пры наяўнасці віду на жыхарства ў іншай краіне), для навучання, працы і камандзіроўкі (пры наяўнасці адпаведных дакументаў), але ў гэтых выпадках не часцей за адзін раз за шэсць месяцаў (у верасні мінулага года перасякаць мяжу наземным транспартам урад дазволіла раз у тры месяцы). Не распаўсюджваліся абмежаванні на выезд на дыпламатаў, членаў афіцыйных дэлегацый, вадзіцеляў-міжнароднікаў, а таксама не датычыліся авіяпералётаў.