"Мінімалка" павялічылася ў Беларусі

МІНСК, 12 мая – Sputnik. Памер месячнай мінімальнай заработнай платы за красавік у Беларусі складае 480 рублёў 96 капеек, паведамілі ў Міністэрстве працы і сацыяльнай абароны.

Да гэтага мінімальная заработная плата была праіндэксавана ў сакавіку гэтага года, пасля чаго яна вырасла да 479 рублёў 83 капеек.

Звычайна ўлады ўстанаўліваюць новую суму "мінімалкі" з 1 студзеня кожнага года. Сёлета яе памер склаў 457 рублёў, у мінулым годзе яна складала 400 рублёў, аднак пасля праведзенай у верасні 2021-га індэксацыі мінімальная зарплата вырасла да 417 рублёў 86 капеек.

Найбольшая колькасць пераразлікаў МЗП была ў 2012, 2013 і 2015 гадах – тады яна пералічвалася тры разы на год.

Мінімальны заробак вызначае самы нізкі парог аплаты працы ў краіне. Менш за гэтую суму арганізацыі і прадпрыемствы не маюць права плаціць сваім работнікам. Аднак гэтая норма не дзейнічае для дагавора падраду. "Мінімалка" таксама не з’яўляецца сацыяльным нарматывам у адрозненне ад базавай велічыні або базавай стаўкі, да яе не прывязаны памеры дапамог, штрафаў і падаткаў.

Індэксацыю мінімальнай зарплаты звычайна праводзяць з-за росту інфляцыі ў краіне. Чым большы рост, тым большы памер "мінімалкі".

Напярэдадні ў Белстаце паведамілі, што індэкс спажывецкіх цэн на тавары і паслугі ў красавіку 2022 года ў параўнанні з сакавіком склаў 101,6%.

Рост інфляцыі ў сакавіку на 6,1% Нацбанк тлумачыў ростам геапалітычнай напружанасці і ўзмацненнем санкцыйнага ціску.

Нагадаем, што па выніках 2020 года інфляцыя ў Беларусі склала 7,4%, а ў мінулым годзе яна ледзь не дацягнула да 10%. У 2022 годзе па ўказе прэзідэнта гэты паказчык не павінен пераступіць адзнаку 6%.