МІНСК, 21 мая – Sputnik. Унутраныя войскі МУС Беларусі дазволена прыцягваць да аховы дзяржмяжы, абноўлены закон за подпісам кіраўніка дзяржавы апублікаваны ў суботу на Нацыянальным прававым інтэрнет-партале.
У ім, у прыватнасці, указваецца, што ўнутраныя войскі цяпер будуць удзельнічаць "у мерапрыемствах па ўзмацненні аховы дзяржаўнай мяжы Рэспублікі Беларусь, лакалізацыі і спыненні канфліктных сітуацый, масавых беспарадкаў, іншых супрацьпраўных дзеянняў на прыгранічнай тэрыторыі".
Таксама гэтым войскам дазволілі ўдзельнічаць у тэрытарыяльнай абароне. Гэта род войск, які склікаецца толькі на час вайны або ў перыяд складанай ваенна-палітычнай абстаноўкі.
Іншыя задачы "ўнутранікаў"
Адзначаецца, што пры ўзнікненні абставін, якія ўяўляюць пагрозу бяспецы грамадзян, дзейнасці арганізацый і грамадскаму парадку, а таксама ў інтарэсах абароны Беларусі ўнутраныя войскі могуць прыцягвацца да выканання іншых задач.
Акрамя таго, задачамі ўнутраных войск застаюцца:
удзел у ахове грамадскага парадку, забеспячэнні грамадскай бяспекі,
ахова папраўчых калоній, лячэбных папраўчых устаноў,
канваіраванне і ахова асуджаных і асоб, якія ўтрымліваюцца пад вартай,
удзел у вышуку асоб, якія ўчынілі ўцёкі з-пад аховы і нагляду ў папраўчых установах,
ахова асабліва важных дзяржаб’ектаў і спецыяльных грузаў,
абясшкоджванне і знішчэнне неразарваных авіяцыйных боепрыпасаў.
Згодна з абноўленым законам, пашыраюцца меры абароны байцоў унутраных войск і членаў іх сямей. У адносінах да іх забараняецца распаўсюджванне інфармацыі аб дыслакацыі і перамяшчэннях.
"Не дапускаецца распаўсюджванне ў публічным выступленні, сродках масавай інфармацыі звестак аб месцах дыслакацыі, <…> аб іх удзеле ў аперацыях па забеспячэнні грамадскай бяспекі", – гаворыцца ў дакуменце.
Пры наяўнасці пагрозы замаху на жыццё і здароўе вайскоўцаў, а таксама членаў іх сямей прымяняюцца меры дзяржаўнай абароны.
Узмацненне мяжы Беларусі
Цяпер задачы па ахове мяжы разам з пагранічнікамі выконваюць і вайскоўцы. Батальённымі тактычнымі групамі быў істотна ўзмоцнены заходні і паўднёвы кірунак, дзе праходзіць дзяржаўная мяжа з Латвіяй, Літвой, Польшчай і Украінай. Гэта даручэнне прэзідэнта Аляксандра Лукашэнкі.
Беларускія вайскоўцы нясуць службу на мяжы на ратацыйнай аснове, праз некалькі тыдняў падраздзяленні вяртаюцца ў пункты пастаяннай дыслакацыі, а іх пазіцыі займаюць іншыя.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Чытайце таксама:
Супраць Беларусі і Расіі вядуць гібрыдную вайну – Лукашэнка
Пуцін сказаў, чым насамрэч займаюцца ЗША і НАТА, і як адкажа АДКБ
Расія створыць 12 воінскіх часцей з-за новых пагроз на Захадзе
Макей: Мінск выступае за найхутчэйшае ўрэгуляванне канфлікту ва Украіне
У Крамлі прааналізуюць наступствы ўступлення Фінляндыі і Швецыі ў НАТА