МІНСК, 16 чэр - Sputnik. У Беларусі за першы квартал гэтага года знізілася спажыванне малочных прадуктаў, менш жыхары краіны сталі есці і хлеба, мяса і бульбы, упалі лічбы і па ўжыванні спіртнога, такія дадзеныя прыводзіць Нацстат.
Згодна з лічбамі статыстыкі, малака, сыроў, смятаны, кефіру, ражанкі і іншых малочных прадуктаў "сярэдні беларус" стаў спажываць на 3,2 кг менш, чым летась.
Статыстычнае ведамства асобна лічыць, колькі беларусы ядуць масла, і тут таксама лічбы сталі меншымі, але не так значна - калі летась за першы квартал на аднаго беларуса прыходзіўся адзін кілаграм масла і тлушчаў, то сёлета - 900 грам.
Хлеба, мучнога і мяса беларусы, што цікава, ядуць аднолькава, і ўпала іх спажыванне ў роўных прапорцыях - на 600 грам на тры месяцы. За першы квартал 2021 года беларусы з'елі 7,3 кг мяса і столькі ж мучнога, а ў першым квартале 2022 года ўжо па 6,7 кг.
На 600 грам за квартал зменшылася ў параўнанні з 2021 годам колькасць ягад, якія з'елі беларусы, на 400 грам менш сталі есці гародніны і бахчавых, на 200 грам - бульбы.
Паводле даных статыстычнага ведамства, агародніны і бахчавых адзін беларус з'еў 6,8 кг, садавіны і ягад 6,4 кг, а вось бульбы - толькі 4,8 кг.
Беларусы па-ранейшаму "не любяць" рыбу
Паводле звестак Белстата, у квартал адзін беларус з'ядае каля двух дзясяткаў яек, але калі ў пачатку мінулага года дакладная лічба была 21 яйка за квартал, то ў першым квартале гэтага на два менш - 19.
А вось салодкага беларусы з'елі за квартал толькі на 100 грамаў менш, чым летась, але і спажыванне цукру і кандытарскай прадукцыі ў нас у краіне – 2,3 кг у першым квартале гэтага года.
Яшчэ адзін цікавы факт, які вынікае з падлікаў статыстычнага ведамства, рыбы беларусы і сёлета і летась селі 1,3 кг за першы квартал, не гледзячы на ўсе даныя аб карысці рыбнай дыеты, густы беларусаў не змяніліся.
Структура і ўзровень даходаў
Паводле звестак Белстата, на прадукты ў першым квартале гэтага года хатнія гаспадаркі беларусаў патрацілі 36,8% ад усіх даходаў.
У мінулым годзе на ежу сыходзіла на 2,8% больш ад даходаў беларусаў - у першым квартале 2021 года 39,6%. Дарэчы, менш беларусы сталі траціць і на алкаголь - з 2,7% да 2,5% заробку знізіліся выдаткі на спіртное ў беларусаў за год.
На 0,2% беларусы сталі менш траціць на жыллё, у першым квартале гэтага года лічба склала 11,2% ад даходаў, а на аплату камунальных паслуг прыпадаюць тыя ж 7,2% даходаў, што і ў мінулым годзе.
Адчувальна выраслі выдаткі на медыцыну - з 6,4% ад даходаў у першым квартале мінулага года, да 7,2% у гэтым.
Больш трацяць і на транспарт - у пачатку мінулага года яны складалі 8% ад даходаў, а цяпер - 8,9%. Пры гэтым выдаткі на грамадскі транспарт гэта толькі 1,9% ад даходаў у першым квартале мінулага года, і 2% у першым квартале гэтага.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Чытайце таксама:
МАРГ растлумачыў прычыны інфляцыі ў Беларусі
Агуркі патаннелі ўдвая, згушчонка і цыбуля - даражэй: што было з цэнамі ў маі
Прафсаюзы: цэнаўтварэнне ў Беларусі павінна быць справядлівым