Мінск заклікаў ААН заснаваць механізм адказнасці за аднабаковыя санкцыі

МІНСК, 16 чэр - Sputnik. Арганізацыі Аб'яднаных Нацый неабходна ўвесці міжнародны механізм адказнасці за прымяненне аднабаковых санкцый, паколькі яны груба парушаюць правы чалавека, заявіла пастаянны прадстаўнік Беларусі пры ААН Ларыса Бельская.

Як паведамілі ў МЗС краіны, падчас дыскусіі з Вярхоўным камісарам ААН дыпламат падкрэсліла, што заходнія краіны актыўна выкарыстоўваюць аднабаковыя рэстрыкцыі, "якія груба і масава парушаюць правы чалавека ў розных краінах, уключаючы дзяржавы-аб'екты і дзяржавы-ініцыятары санкцый, а таксама краіны, якія сталі на шлях развіцця".

"Пастаянны прадстаўнік Беларусі падкрэсліла, што гэта не павінна заставацца бяскарным і заклікала ААН заснаваць міжнародны механізм падсправаздачнасці за прымяненне аднабаковых прымусовых мер", - гаворыцца ў паведамленні на афіцыйным сайце беларускага знешнепалітычнага ведамства.

Акрамя таго, Ларыса Бельская заявіла, што дыскрымінацыйная палітыка Захаду груба парушае правы чалавека ў спорце і палітызуе яго.

У сувязі з гэтым яна рашуча асудзіла адхіленне ад удзелу ў спаборніцтвах паралімпійцаў і спартсменаў Беларусі і Расіі. Бельская запатрабавала ад ААН і Міжнароднага Алімпійскага камітэта прыняць экстраныя меры па поўным аднаўленні правоў беларускіх і расійскіх атлетаў, паведамілі ў МЗС.

Пасля пачатку Расіяй ваеннай спецаперацыі на Украіне краіны Захаду пачалі ўвядзенне новых санкцый супраць РФ, рэстрыкцыі таксама вельмі сур'ёзна закранулі і Беларусь.

4 чэрвеня ўступіў у сілу ўжо шосты санкцыйны пакет супраць РФ і рэспублікі, накіраваны на яшчэ мацнейшае прыгнечанне эканомік дзвюх краін.

У прыватнасці, пакет змяшчае поўную забарону на паслугі, якія адносяцца да транспарціроўкі нафты з Расіі – з ліпеня 2022 года еўрапейскім кампаніям забароняць аказваць суднаходныя, брокерскія, страхавыя і фінансавыя паслугі ў гэтай сферы. Захад разлічвае, што новыя рэстрыкцыі скуюць нафтавую галіну Расіі і не дазволяць шукаць альтэрнатыўных пакупнікоў на энергарэсурсы.

Што да Беларусі, то заходнія краіны паэтапна ўводзілі санкцыі ў дачыненні да афіцыйных асоб і прадпрыемстваў рэспублікі, абвінавачваючы Мінск у парушэннях падчас выбараў і парушэнні правоў чалавека.

Чарговы этап пашырэння заходніх санкцый адбыўся з-за падтрымкі Мінскам расійскай ваеннай спецаперацыі ва Украіне.

Рэстрыкцыі закранулі не толькі эканомікі РФ і Беларус, але і гуманітарную сферу, СМІ, а таксама спорт. Так, расійскім і беларускім атлетам забаранілі ўдзельнічаць у шматлікіх міжнародных турнірах. Абмежаванні закранулі нават Паралімпіяду ў Кітаі.

Як растлумачыў 8 чэрвеня кіраўнік МАК Томас Бах, спартсменаў РФ і Беларусі камітэт рэкамендаваў адхіліць ад міжнародных спаборніцтваў толькі таму, што такім чынам хацеў абараніць іх ад магчымых актаў агрэсіі, ужо праяўленых у розных краінах.

Ён таксама заявіў, што санкцыі не павінны прымяняцца да спартсменаў толькі за тое, што яны з'яўляюцца грамадзянамі той ці іншай дзяржавы.