МІНСК, 28 вер – Sputnik. У Беларусі амаль чвэрць легкавых аўтамабіляў абсталявана аўтаматычнай трансмісіяй. Заканадаўцы пайшлі на сустрэчу аматарам машын з АКПП, зрабіўшы змены ў закон аб дарожным руху.
Падрабязнасці расказаў начальнік аддзялення забеспячэння правапрымяняльнай дзейнасці ўпраўлення арганізацыйнай работы і забеспячэння правапрымяняльнай дзейнасці ГУ ДАІ МУС Аляксандр Шаўчэнка ў мультымедыйным прэс-цэнтры Sputnik Беларусь.
Па словах прадстаўніка ДАІ, паступалі шматлікія звароты грамадзян, каб скарэкціраваць праграмы навучання і здачы практычнага экзамену на "правы". Раней атрымаць вадзіцельскія пасведчанні можна было толькі на аўтамабілі з механічнай трансмісіяй.
"Цяпер малады вадзіцель, які збіраецца атрымаць вадзіцельскае пасведчанне, можа адразу заявіць, што я хачу навучацца на аўтамабілі з аўтаматычнай трансмісіяй і праходзіць такое навучанне на такім транспартным сродку. У далейшым пасля паспяховага праходжання навучання ён здае адпаведныя кваліфікацыйныя экзамены ў ДАІ і таксама на аўтамабілі з аўтаматычнай трансмісіяй", - сказаў Шаўчэнка.
Ён атрымае пасведчанне з асаблівай адзнакай, якая дае права кіраваць аўтамабілем толькі з аўтаматычнай трансмісіяй.
"Калі гэты кіроўца будзе кіраваць у наступным аўтамабілем з механічнай каробкай перадач, то ён будзе расцэньвацца як асоба, якая не мае права кіравання", – папярэдзіў спікер.
Меры ўздзеяння да іх будуць прымяняцца, як і да бяспраўнікаў. Калі такое парушэнне будзе тройчы зафіксавана на працягу года, то можа наступіць нават крымінальная адказнасць. Выйсце толькі адно – паўторна здаць экзамен у ДАІ на аўтамабілі з механікай, пры гэтым "гаворка ідзе аб здачы толькі практычнага экзамену".
Прадстаўнікі ДАІ ў прэс-цэнтры Sputnik Беларусь
© Sputnik
Замежнікам давядзецца мяняць пасведчанне
Размова ідзе не аб турыстах, а аб замежных грамадзянах, якія атрымалі від на жыхарства або іншыя біяметрычныя дакументы. На працягу 90 сутак яны павінны замяніць вадзіцельскае пасведчанне, "ім давядзецца здаваць тэарэтычны экзамен".
Гэтая мера не распаўсюджваецца на грамадзян Расійскай Федэрацыі. Вадзіцельскае пасведчанне РФ на тэрыторыі рэспублікі легітымна да тэрміна заканчэння яго дзеяння.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Чытайце таксама:
Як пасажыру таксі атрымаць кампенсацыю пасля ДТЗ - проста аб законах
У ДАІ расказалі, якія дакументы больш не трэба паказваць пры праверцы
Дзяржаўтаінспекцыя пракаменціравала змены ў ПДР