Пуцін аб дыверсіі на "Паўночных патоках": англасаксы арганізавалі выбухі

МІНСК, 30 вер – Sputnik. Англасаксам мала санкцый, яны перайшлі да дыверсій, сказаў прэзідэнт Расіі Уладзімір Пуцін, каменціруючы інцыдэнты, якія адбыліся на гэтым тыдні, на газаправодах "Паўночны паток" і "Паўночны паток-2".

Ён заявіў, што "ўсім відавочна, каму гэта выгадна". "Каму выгадна, той і зрабіў", - дадаў расійскі прэзідэнт.

Уладзімір Пуцін таксама сказаў, выступаючы ў пятніцу ў Крамлі на цырымоніі падпісання дагавораў пасля рэферэндумаў у ЛНР, ДНР, Херсонскай і Запарожскай абласцях аб далучэнні да Расіі, што амерыканская эліта выкарыстоўвае ўкраінскі крызіс для паслаблення сваіх прамых канкурэнтаў. Гэта датычыцца не толькі Расіі, але і многіх еўрапейскіх дзяржаў – Францыі, Італіі, Іспаніі і іншых, падкрэсліў прэзідэнт РФ.

"Вашынгтон патрабуе ўсё больш санкцый супраць Расіі, і большасць еўрапейскіх палітыкаў з гэтым пакорна згаджаецца. Яны ж ясна разумеюць: ЗША праціскаюць поўную адмову ад расійскіх энерганосьбітаў і іншых рэсурсаў, вядуць справу практычна да дэіндустрыялізацыі Еўропы. Да таго, каб поўнасцю прыбраць да рук еўрапейскі рынак", - рэзюміраваў Пуцін.

Газаправод "Паўночны паток" быў спынены напрыканцы лета для правядзення планавых работ. Прыпыненне падачы газу выклікала рост цаны на блакітнае паліва, кошт тысячы кубаметраў якога перавысіў 2 900 долараў. "Газпром" зноў запусціў газаправод 3 верасня, паведамлялася, што трохдзённае спыненне прапампоўкі пазбавіла Еўропу амаль 100 млн "кубоў" расійскага газу.

Уцечкі адразу на двух расійскіх экспартных газаправодах у Еўропу "Паўночны паток" і "Паўночны паток-2" здарыліся ў панядзелак, 26 верасня. З-за інцыдэнту адбылося зніжэнне ціску ў газаправодах. Усяго было знойдзена чатыры ўцечкі газу.

Прычыны надзвычайнага здарэння пакуль невядомыя, аднак спецыялісты мяркуюць, што мела месца дыверсія. Шэраг краін таксама выказалі меркаванне, што інцыдэнты не выпадковыя. У Маскве заявілі, што для ацэнкі таго, што адбылося з ніткамі "Паўночнага патоку", трэба правесці расследаванне, паколькі ёсць шмат пытанняў. Прэс-сакратар расійскага прэзідэнта Дзмітрый Пяскоў асабліва адзначыў, што не ў інтарэсах РФ пашкоджанне нітак "Паўночных патокаў", паколькі краіна пазбавілася маршрутаў пастаўкі газу ў Еўропу.

Што тычыцца рамонту газаправодаў, ён можа заняць каля года, такое меркаванне выказаў старшыня камітэта Дзярждумы па энергетыцы Павел Завальны. Аднаўленне, паводле яго слоў, можна правесці двума спосабамі: пад вадой (для гэтага трэба вырабляць кесон) або на сушы (для гэтага давядзецца паднімаць трубы на паверхню).