Грызлоў: у сферы сацыяльна-гуманітарнага развіцця СД важны агульныя стандарты

МІНСК, 20 кас – Sputnik. У пытаннях сацыяльна-гуманітарнага развіцця Саюзнай дзяржавы важна мець агульныя стандарты, сказаў пасол Расіі Барыс Грызлоў у час наведвання філіяла РДСУ, перадае карэспандэнт Sputnik.

Паводле яго слоў, выкладчыкам і студэнтам філіяла Расійскага дзяржаўнага сацыяльнага ўніверсітэта трэба ганарыцца тым, што яны працуюць і вучацца ў такой важнай для краіны навучальнай установе. Таму што ў розныя гады працы РДСУ яго выпускнікамі стала цэлая кагорта вялікіх палітычных дзеячаў.

Пры гэтым ён нагадаў аб тым, што краіны дамовіліся аб выкананні 28 саюзных праграм. У іх закладзена прыкладна 900 пунктаў і 500 з іх ужо выканана. Рэалізацыя праграм пачалася ў студзені бягучага года, а скончыцца павінна ў снежні 2023 года.

"Мы менш чым за год выканалі больш за палову задач, якія ставіліся гэтымі праграмамі", – падкрэсліў пасол РФ.

На яго думку, філіял РДСУ ў Мінску павінен стаць пляцоўкай цеснага ўзаемадзеяння расійскіх і беларускіх палітычных дзеячаў, вучоных і палітолагаў, экспертнай супольнасці. На гэтай пляцоўцы кіраўнік МЗС РФ Сяргей Лаўроў ужо правёў у гэтым годзе пасяджэнне камісіі партыі "Единая Россия" па міжнародных пытаннях і пытаннях суайчыннікаў. У гэтым пасяджэнні, што немалаважна, прынялі ўдзел і прадстаўнікі беларускай палітычнай супольнасці, якія актыўна ўключыліся ў працу.

Барыс Грызлоў звярнуў увагу, што філіял РДСУ можа стаць цэнтрам, дзе будуць выпрацоўвацца стандарты ў адукацыйнай і навуковай сферы Саюзнай дзяржавы. Цяпер 28 саюзных праграм не ўтрымліваюць гэтыя пытанні.

У сваю чаргу рэктар РДСУ Андрэй Хазін паведаміў, што ў бліжэйшы час філіялы ўніверсітэта павінны быць адкрыты ў краінах, якія ўваходзяць у БРІКС. У сувязі з гэтым РДСУ неабходны цэнтр, дзе выкладчыкі і студэнты змогуць павышаць сваю кваліфікацыю. Мяркуецца, што прыдатнай пляцоўкай для яго працы стане менавіта філіял у Мінску.

Андрэй Хазін праінфармаваў новага дырэктара філіяла РДСУ Ірыну Селязнёву, што будзе шмат працы, звязанай з пашырэннем навучальнай установы і будаўніцтвам новага кампуса. Таксама выкладчыкам філіяла трэба будзе ўвесь час павышаць свой прафесійны ўзровень, каб адпавядаць тым задачам і выклікам, якія перад імі ставіць час.