Мінсельгасхарч зноў абнавіў мінімальныя экспартныя цэны на прадукты

МІНСК, 23 кас – Sputnik. Мінсельгасхарч чарговы раз прыняў рашэнне ўнесці карэкціроўкі ў мінімальныя экспартныя цэны на некаторыя айчынныя прадукты, гэта прадугледжана ведамаснай пастановай №102 ад 20 кастрычніка, якая афіцыйна апублікавана на Нацыянальным прававым інтэрнэт-партале.

У чэрвені гэтага года беларускі ўрад устанавіў пералік тавараў, экспартныя цэны на якія рэгулююцца Мінсельгасхарчам. Для гэтага ведамства ўстанаўлівае гранічныя мінімальныя цэны.

У гэты пералік уключаны асобныя віды малочнай і мясной прадукцыі.

Пасля гэтага Мінсельгасхарч тройчы ўносіў карэкціроўкі ў гэтыя цэны, зараз ведамства зноў прыняло рашэнне іх абнавіць.

Як і раней цэны ўстанаўліваюцца ў залежнасці ад рэгіёна экспарту. Усяго выдзелены пяць: Расія; краіны ЕАЭС, акрамя Расіі; краіны СНД і Грузія, акрамя краін ЕАЭС і Азербайджана; Азербайджан; краіны па-за СНД, акрамя Грузіі.

Згодна з новым дакументам, мінімальныя экспартныя цэны на свежыя і ахалоджаныя, а таксама замарожаныя тушы і паўтушы буйной рагатай жывёлы засталіся на ранейшым узроўні. Але з’явіліся такія пазіцыі, як неабваленыя водрубы БРЖ, мінімальны ўзровень цэн на іх устаноўлены такі ж, як і на тушы і паўтушы. Калі яны атрыманы ад маладняку, іх можна рэалізоўваць на экспарт па цане не ніжэйшай за 4,3 долара за кілаграм у краіны СНД і Грузію, а ад дарослай БРЖ – па 4,1 долара. Для дзяржаў за межамі СНД устаноўлены цэны 4,35 і 3,9 долара за кілаграм.

Цэны на малако і вяршкі, згушчаныя, у парашку, гранулах або ў іншых цвёрдых відах, як з дабаўленнем цукру, так і без, не змяніліся.

А на сметанковае масла і сыры рознай тлустасці мінімальны парог крыху зменены ў бок павелічэння, але не для ўсіх рэгіёнаў.

Пастанова набыла моц з 21 кастрычніка.